«Ունենք թաղամասեր, որտեղ տրանսպորտի վիճակը վատացել է, օրինակ՝ Նորագավիթում». Տիգրան Ավինյան

«Մարդկանց հիմնական խնդիրը մնում է ավտոբուսների հաճախականությունը: Կան գծեր, որտեղ պարբերաբար գերծանրաբեռնվածություն ունենք, որն առաջնային խնդիր է և պետք է լուծենք»,- Երևանի քաղաքապետարանի գործակարգավարական խորհրդակցության ժամանակ ասաց քաղաքապետ Տիգրան Ավինյանը: «Ունենք թաղամասեր, որ վատացել է իրավիճակը, օրինակ՝ Նորագավիթում: Մեր հետագա քայլերը պետք է լինեն այն ուղղությամբ, որ մենք սկսենք լուծել ծայրահեղ ծանր գծերի հարցերը, լուծումներ գտնենք՝ ավտոբուսների գնմամբ: Մենք հիմա ամեն ինչ փորձում ենք տանել դեպի նրան, որ ավտոմեքենաների հոսքը Երևան քաղաքում նվազի, և ավելանան մարդիկ, ովքեր օգտվում են հանրային տրանսպորտից: Դա նշանակում է, որ հանրային տրանսպորտում հոսքը պետք է ավելանա և մենք պատշաճ մակարդակի ծառայություն պետք է մատուցենք»,- նշեց քաղաքապետը՝ հավելելով, որ 171 նոր ավտոբուսները, 15 տրոլեյբուսները այդ հարցում օգնելու են, բայց դեռ կան կոնկրետ հարցեր, որոնք պետք է լուծումներ ստանան: