««Երիտասարդական քաղաքականության մասին» օրենքի նախագիծը հեռու է իրավական որոշակիությունից»․ Լիլիթ Գալստյան

«Շատ ակնհայտ է, որ այս նախագիծը բացարձակապես հեռու է իրավական որոշակիությունից և ավելի շատ հայեցակարգ է հիշեցնում, հայեցակարգ, նպատակադրումներ, ավելի շատ ծրագրային փաստաթուղթ է»։ «Երիտասարդական քաղաքականության մասին» օրենքի նախագիծի վերաբերյալ այսպիսի տեսակետ հայտնեց ԱԺ «Հայաստան» խմբակցության պատգամավոր Լիլիթ Գալստյանը Աժ լսումների ժամանակ։ Նրա բնորոշմամբ, նախագիծը չի ներառում երաշխիքներ, գործիքակազմեր։
Պատասխանելով Գալստյանի դիտարկմանը, ԿԳՄՍ փոխնախարար Արթուր Մարտիրոսյանն ասաց․ «Համաձայն եմ, որ այստեղ հայեցակարգային շատ կարևոր դրույթներ ամրագրվում են, կարող է նման տպավորություն ստեղծվի, բայց մյուս կողմից սա օրենք է, որը սահմանում է առաջինը հասկացությունները, թե հստակ ում հետ գործ ունենք, և երկրորդը՝ տարանջատում է տարբեր պետական կառավարման և ՏԻՄ-երի և մյուս դերակատարների գործառույթներն ու լիազորությունները»։
Հիշեցնենք, որ «Երիտասարդական քաղաքականության մասին» օրենքի նախագծի հիմնավորման մեջ ասված է․ «Օրենքի ընդունման արդյունքում կկարգավորվեն պետական երիտասարդական քաղաքականության սուբյեկտների միջև իրավահարաբերությունները, կհստակեցվի պետական լիազոր մարմնի, տեղական ինքնակառավարման մարմինների և երիտասարդության ոլորտում գործող խորհրդատվական մարմինների միջև հարաբերություննեը, լիազորություններն ու պարտականությունները:

Կստեղծվի պետական երիտասարդական քաղաքականության սահմանման և նպատակների իրականացման համար անհրաժեշտ իրավական հենքը: Օրենքի ընդունմամբ նաև կբարձրանա երիտասարդության շրջանում պետական քաղաքականության դերակատարությունը, հնարավորություն կստեղծվի իրականացնել ավելի արդյունավետ վարչարարություն, որի շնորհիվ երիտասարդության շրջանում ներգրավված բոլոր շահագրգիռ կողմերը օրենսդրորեն ամրագրված կարգավորումների շրջանակում մասնակցություն կունենան վարվող քաղաքականությանը»: