«ՔՊ-ի գրասենյակում՝ ԿԲ պաշտոնյաների ներկայություն, մինչդեռ օրենքը պահանջում է քաղաքական չեզոքություն»․Հակոբ Բադալյան

Մեկնաբան Հակոբ Բադալյանի ֆեյսբուքյան գրառումը․ «Հայաստանից բացի էլ ինչպիսի՞ պետությունում է հնարավոր, որ, օրինակ, Կենտրոնական բանկի նախագահը մասնակցի որևէ գործարար համայնքի հավաքույթի, անկախ դրա մասշտաբից:
Սա լուրջ հարց է, ընկերնե՛ր: Կենտրոնական բանկ, Սահմանադրական դատարան, ԱԱԾ, Հետախուզություն, Քննչական կոմիտե, Հակակոռուպցիոն կոմիտե, Սահմանադրական դատարան․ սրանք ինստիտուտներ են, որոնց ղեկավարները պետք է լինեն առավելագույն անհասանելի՝ տարատեսակ հավաքույթների առնչությամբ:
Ավելին, այդ «անհասանելիության», «անհանրամատչելիության» բարձր աստիճանն է նաև պետական բարձր մշակույթ ձևավորելու առանցքային նախադրյալներից մեկը:
Այս պաշտոնյաները պետք է թերևս «դուրս բերվեն» նաև պետական արարողակարգի շատ ու շատ միջոցառումներից: Նրանք պետք է անգամ մամուլի համար լինեն «անհասանելի», իսկ այդ բացը պետք է լրացնեն նրանց խոսնակները, որոնց ֆունկցիան ամենևին ֆեյսբուքյան գործունեությունը չէ:
Հ.Գ. ես էլ չեմ խոսում այն մասին, որ այդպես էլ, ըստ էության, որևէ պետական արձագանքի չարժանացավ հանգամանքը, որ նախորդ տարի Երևանի քաղաքային Ավագանու ընտրության քվեարկության օրը մասնակից ուժերից մեկի՝ ՔՊ-ի գրասենյակում արձանագրվում է ԿԲ բարձրաստիճան պաշտոնյաների անբռնազբոս ներկայություն, այն դեպքում, երբ օրենքը շատ հստակ պահանջում է նրանցից քաղաքական չեզոքություն»: