«Չի լինում առողջ զորակոչիկ, եթե պետությունը ծնված օրից պատշաճ չի վերահսկում երեխայի առողջությունը». Իզաբելլա Աբգարյան

Երևանի ավագանու «Ազգային առաջընթաց» խմբակցության քարտուղար Իզաբելլա Աբգարյանի ֆեյսբուքյան գրառումը. «Այսօր կառավարության նիստին Փաշինյանն անդրադարձել է այդ թվում առողջական խնդիրների պատճառներով բանակ չզորակոչվող երիտասարդների խնդրին։
Նշվեց ծխելու, խմելու, սպորտով չզբաղվելու մասին, բայց չնշվեց այն կարևորը, որի մասին գոռում էի ավագանու նիստին, երբ պոլիկլինիկաներն էին օպտիմալացնում։
Այսպես, երեխային պարտաճանաչ բոլոր հերթական զննումներին պոլիկլինիկա տարած ծնողը միայն զորակոչի ժամանակ է իմանում, որ որդին լուրջ խնդիրներ ունի, որոնք հնարավոր էր և պարտավոր էին վաղ շրջանում հայտնաբերել և բուժել։
Սկոլիոզ, կիֆոզ, հարթաթաթություն, սրտի, տեսողության որոշ խնդիրներ... Այս ամենը հայտնաբերելի և բուժելի խնդիրներ են։
Ի՞նչ պիտի աներ զինկոմիսարիատի բժշկական հանձնաժողովը։ Օդերով պիտի հաներ պոլիկլինիկան, որը չի հայտնաբերել և չի արձանագրել զինակոչիկի թղթերում առողջական խնդիրը։ Բայց ոչ ոք պատասխանատվության չի ենթարկում՝ մեր երեխաների առողջությանը մատների արանքով նայելու համար։
Սովետի ժամանակ, ի դեպ, դպրոց էին գալիս բժիշկները և բոլորին պարտադիր ստուգում։ Որովհետև ռազմավարություն գոյություն ուներ։
Նշեմ նաև, որ ժողովրդի սոցիալական վատ վիճակը, որն էլ ավելի է վատթարացնում ձեր թիմը՝ անընդհատ հարկեր, վճարներ բարձրացնելով, էլ ավելի վատ է անդրադառնում ապագա զինվորի առողջության վրա։
Գնացեք կշռեք երեխեքին, տեսեք թերսնվածությունն ինչ թիվ է կազմում։ Լաբորատոր հետազոտեք օրգանիզմում անհրաժեշտ նյութերի տոկոսաչափը ու առերեսվեք իրականությանը։
Չի լինում առողջ զորակոչիկ, եթե պետությունը ծնված օրից մինչև չափահաս դառնալը պատշաճ չի վերահսկում երեխայի առողջությունը»: