ԹԻՀԿ-ն՝ Տիգրան Ավինյանի՝ «ՍիվիլՆեթ»-ին դատի տալու մասին

«Թրանսփարենսի Ինթերնեշնլ հակակոռուպցիոն կենտրոն» ՀԿ-ն ֆեյսբուքյան էջում հայտնում է․ «Երևանի քաղաքապետ Տիգրան Ավինյանը «մի մեծ աղբանոց» է անվանել լրատվամիջոցներին։ Նա նաև դատի է տվել CivilNet-ին ու տեղեկացրել է, որ հորը ևս հորդորել է դատական հայց ներկայացնել։ Հայցի պատճառը ՍիվիլՆեթի լրագրողներ Մկրտիչ Կարապետյանի և Անի Գրիգորյանի հետաքննական հոդվածն է, որը պատրաստվել է Կազմակերպված կոռուպցիայի և հանցավորության լուսաբանման նախագծի (OCCRP) հետ համագործակցության շրջանակում։
Հոդվածը լուսաբանում է գյուղատնտեսության ոլորտում՝ խաղողի, ժամանակակից տեխնոլոգիաներով մշակվող ինտենսիվ պտղատու այգիների հիմնման 2018 թվականի պետական աջակցության ծրագրի ծախսերը։ Ծրագրի շահառուները 109 ընկերություններ են, որոնցից հինգը, որոնք ստացել են ծրագրի ընդհանուր գումարի 15 տոկոսը, որպես ենթակապալառու ներգրավել են 2018-2021 թվականներին փոխվարչապետ հանդիսացող և գյուղատնտեսության ոլորտը համակարգող Տիգրան Ավինյանի ընտանիքին պատկանող «Իրիգեյթ» ընկերությանը՝ պտղատու այգիներ հիմնելու նպատակով։ Շահառուները հարյուր հազարավոր դոլարներ են ստացել կառավարությունից՝ պտղատու այգիներ հիմնելու համար։
ՍիվիլՆեթ-ը մեկնաբանություններ ստանալու ակնկալիքով դիմել էր Տիգրան Ավինյանին, նրա հորը՝ Արմեն Ավինյանին, և եղբորը՝ «Իրիգեյթ»-ի բաժնետեր Դավիթ Ավինյանին, սակայն վերջիններս գրավոր հարցումներին չեն պատասխանել։ Սիվիլնեթ-ի հարցումներին՝ «Իրիգեյթի» ստացած գումարների և սուբսիդավորման վերաբերյալ լիարժեք չի պատասխանել նաև Էկոնոմիկայի նախարարությունը։
Լրատվամիջոցները հանդիսանում են ժողովրդավարության կարևորագույն հենասյուներից մեկը, ուստի դրանց պիտակավորումը հանրային պաշտոնյաների կողմից իրենց գործունեությունը, հանրային ռեսուրսների օգտագործումը լուսաբանելու կամ քննադատելու համար դատապարտելի ու անընդունելի է։
Հանրային պաշտոնյան պետք է առավել հանդուրժող լինի ԶԼՄ-ների և քաղաքացիական հասարակության կառույցների քննադատության նկատմամբ, և ապահովի, որ հանրությունը ողջամիտ ժամկետներում պատշաճ պատասխան ստանա իրեն հուզող հարցերի վերաբերյալ, այդ թվում՝ պաշտոնյաների փոխկապակցված անձանց կողմից։
Պետք է երաշխավորվի պետական կառավարման ու տեղական ինքնակառավարման հաստատությունների թափանցիկությունը և հանրային պաշտոն զբաղեցնող անձանց հաշվետվողականությունը հանրության առջև»։