«Դե պատասխանեիք լրատվամիջոցի հարցմանը, եթե ծածկելու բան չունեք»․ Զառա Հովհաննիսյան

Իրավապաշտպան, հրապարակախոս Զառա Հովհաննիսյանի ֆեյսբուքյան գրառումը․ «Օրերս Երևանի քաղաքապետ Տիգրան Ավինյանը հայտարարեց, որ հայցադիմում է ներկայացրել Երևան քաղաքի ընդհանուր իրավասության դատարան՝ ընդդեմ ՍիվիլՆեթի: Նշեմ, որ Սիվիլնեթն իմ ամենանախընտրելի լրատվամիջոցներից է, ավելին, ես նաև հանդիսանում եմ Սիվիլնեթի սյունակագիր, և այս լրատվամիջոցի հրապարակած ցանկացած տեղեկատվության հավաստիության մեջ լիարժեքորենք վստահ եմ: Նաև, Սիվիլնեթը ստեղծում է որակյալ բովանդակություն, զգայուն է մարդու իրավունքների նկատմամբ, հատուկ ուշադրություն է դարձնում հետաքննական լրագրությանը և կոռուպցիայի դեմ պայքարին:
Թե ինչո՞ւ է Ավինյանին զայրացրել Սիվիլնեթը, շատ պարզ է, լրատվամիջոցի կողմից հրապարակվել են փաստեր, որոնք ցուցադրում են պետական պաշտոնյայի և նրա բիզնեսի փոխկապակցվածությունն ու ընտանեկան կապիտալի շեշտակի աճը 2018 թվականից հետո:
Հիմա հարց, եթե դա այդպես չէ, ապա ինչո՞ւ լրատվամիջոցի հարցումներին չեք պատասխանում, պարոնայք, հրապարակված հոդվածում հստակ նշված է, որ Տիգրան Ավինյանը, նրա հայրը՝ Արմեն Ավինյանը, Դավիթ Ավինյանը՝ Տիգրան Ավինյանի եղբայրը, չեն պատասխանել ՍիվիլՆեթի մեկնաբանություններ ստանալու գրավոր հարցումներին։ Չէ՞ որ լրատվամիջոցները կոչված են ապահովելու հանրային հաշվետվողականությունն ու թափանցիկությունը և Տեղեկատվության ազատության մասին օրենքով ամրագրված է տեղեկատվություն ստանալու իրավունքն ու ու ազատությունը: Դե պատասխանեիք ու պարզաբանեիք, եթե ծածկելու բան չունեք:
Փոխարենը, լրատվական դաշտն անվանարկելով եք զբաղված, ինչպես նաև, դատական համակարգը ծանրաբեռնելով:
Բայց հիշեք, որ պաշտոնը հավերժ չէ...»։