«Անվտանգությունն ամենից կարևորն է, որին նաև մենք պիտի տեր կանգնենք». Նաիրի Հոխիկյան

Լրագրող Նաիրի Հոխիկյանի ֆեյսբուքյան գրառումը․ «Երբ սոցցանցերում գրում են առողջական խնդիրներ ունեցող մարդկանց մասին՝ խնդրելով փող հավաքել նրանց բուժման համար, ոչ ոք չի ասում, թե դրա պատասխանատուն Առողջապահության նախարարությունն է, թող այդ գերատեսչությունն էլ բուժի իր քաղաքացիներին։ Բոլորը մի մարդու պես հավաքում են անհրաժեշտ փողը և կազմակերպում հիվանդի բուժումը։
Երբ գրվում է սոցիալական խնդիրներ ունեցող մարդկանց մասին, կրկին ոչ ոք չի ասում, թե դրա պատասխանատուն Սոցիալական հարցերի նախարարությունն է։ Կրկին բոլորը մեկ մարդու նման հավաքում են անհրաժեշտ փողը և փոխանցում կարիքավոր ընտանիքին։
Իսկ երբ խոսվում է հայկական բանակին անհրաժեշտ այս կամ այն ապրանքի, ընդհանրապես, առաջնագծի կահավորման մասին, միանգամից հայտնվում են հարյուրավոր մարդիկ, որոնք շեշտում են, թե դրա պատասխանատուն Պաշտպանության նախարարությունն է, հետևաբար իրենք պարտավոր չեն օգնել բանակին։ Սա էլ իր հերթին պատճառ է դառնում, որ ուրիշ շատերն էլ այդ ալիքի տակ հրաժարվեն օգտակար լինելուց մեր բանակին, հրաժարվեն ուժեղացնելուց առաջնագիծն ու հայ զինվորին։
Իրականում մենք պատասխանատու ենք մեր հայրենիքի ամեն կտորի ու ամեն մարդու համար։ Իհարկե, պետք է պատասխանատվություն պահանջենք նաև կառավարությունից, բայց անվտանգությունը ամենից կարևորն է, որին նաև մենք պիտի տեր կանգնենք»։