«Սա կլինի հաջորդ ամենածանր հակապետական քայլը»․ Դավիթ Մանուկյան

«Ապրելու երկիր» կուսակցության քաղաքական խորհրդի անդամ Դավիթ Մանուկյանի ֆեյսբուքյան գրառումը. «Մի կողմ թողնենք այն փաստը, որ Հայաստանը սա հայտարարում է ի պատասխան Ալիևի պահանջի՝ լուծարել Մինսկի խումբը։
Արցախն Ադրբեջանի կազմում ճանաչելուց հետո, սա կլինի հաջորդ ամենածանր հակապետական քայլը գործող իշխանությունների կողմից։ Եթե Հայաստանի Հանրապետությունը, որոշի գնալ Մինսկի խմբի լուծարմանը՝ դրանով լեգիտիմացնելու է Ադրբեջանի իրականացրած հանցագործությունները, Հայաստանի և Արցախի նկատմամբ։ Ստացվում է՝ ընդունելի և օրինական է, զենքի ուժով հարցեր լուծելը։ Մենք մեր ձեռքով, մեզ ճանաչելու ենք ագրեսոր և օկուպանտ, իսկ Ադրբեջանը դրանով լեգիտիմացնելու է իր բոլոր քայլերը։ Սա, նաև ուղիղ հարված է Բաքվում գերության մեջ գտնվող մեր հայրենակիցներին, քանի որ Ադրբեջանը դրանից հետո ունենալու է լուրջ հիմքեր՝ պնդելու, որ այդ մարդիկ հանցագործներ են, ինչն էլ իր հերթին կրկին արդարացնելու է Ադրբեջանի գործողությունները Արցախում։
Առանց այդ էլ, մեր ողջ անվտանգային համակարգը քանդած իշխանությունը, ցանկանում է լիովին մեզ զրկել անգամ այն փոքրիկ անվտանգության բարձիկներից, որոնք, գուցե փոքր, բայց որոշակի դեր ունեն անվտանգության ապահովման հարցում։ Անգամ մեկ տոկոսի ազդեցություն ունեցող գործոնները, եթե դրանք վերաբերվում են մեր անվտանգությանը, պետք է հաշվի առնել։
Լավ, որքան կարճատես պետք է լինել, որպեսզի չհասկանաս, թե ինչի է Ալիևը պահանջում լուծարել ԵԱՀԿ Մինսկի խումբը, չէ որ խաղաղություն ցանկացող կողմի համար, դա որևէ արգելք չի հանդիսանում, իսկ այ պատերազմ ցանկացող կողմի համար դա որոշակի խոչընդոտ է»։