Ֆրանսիայում Պոմպիդու կենտրոնը ցուցադրության է ներկայացրել Երվանդ Քոչարի երկու աշխատանք

Հայազգի ականավոր քանդակագործ և նկարիչ Երվանդ Քոչարի 125 ամյակի կապակցությամբ և Ֆրանսիայում Հայաստանի տարվա շրջանակներում Փարիզի նշանավոր Պոմպիդու կենտրոնը, որպես հարգանքի տուրք, ժամանակավոր ցուցադրության է ներկայացրել Երվանդ Քոչարի երկու՝ «Արևելուհիներ» (1926թ.) և «Նկարչությունը տարածության մեջ» (1934թ.) ստեղծագործությունները: Այս աշխատանքները կներկայացվեն կենտրոնի 5-րդ հարկի ցուցասրահում մինչև այս տարվա մարտի 10-ը:

Մեծ արվեստագետի 125-ամյակին նվիրված հարգանքի և հիշատակի միջոցառումները մեկնարկել էին դեռևս անցյալ տարեվերջից: Նոյեմբերի 27-ին Փարիզի Պոմպիդու կենտրոնում տեղի ունեցավ մեծարման երեկո՝ նվիրված Երվանդ Քոչարի և Սերգեյ Փարաջանովի հոբելյաններին Ֆրանսիայում ՀՀ դեսպան Ա. Խաչատրյանի, Պոմպիդու կենտրոնի նախագահ Լորեն Լե Բոնի, Փարիզի ժամանակակից արվեստի թանգարանի տնօրեն Ք. Ռեյի, Երվանդ Քոչարի հարազատների և այլ հյուրերի մասնակցությամբ:
Նաև՝ դեկտեմբերի 3-ին Քոչարի ստեղծագործությունները ևս մեկ անգամ հիշատակվեցին և ներկայացվեցին Պոմպիդու կենտրոնի տարվա ձեռքբերումները ներկայացնող մեծ ցուցահանդեսի պաշտոնական բացման ժամանակ: