«Օհանյանի օրոք եմ ծառայել, օրը 10 000 դրամ էր զորամասից տուն գնալը»․ Սիսակ Գաբրիելյան

ԱԺ-ում քննարկվում է Կրթության բնագավառի տեսչական վերահսկողության և հարակից օրենքներում փոփոխություն կատարելու հարցը։ Առաջարկվող փոփոխությամբ նախատեսվում է կրթության տեսչական մարմնին վերապահել վերահսկողական մի շարք մեխանիզմներ։
ՔՊ-ական պատգամավոր Սիսակ Գաբրիելյանը կարևորեց հատկապես, որ տեսչական մարմնին հնարավորություն է տրվում ուսումնական հաստատություններում ստուգումներ անցկացնել՝ առանց նախապես զգուշացնելու․ «Այս պահին էլ եթե գնաք, ավագ դպրոցների շրջակայքում դասի ժամերին կտեսնենք երեխաներ, որոնց մի մասը պատի տակ ծխում է, մի մասն այլ բանով է զբաղված։ Եթե տեսչականին այս մասին ահազանգում ես, այն պետք է ըստ օրենքի նախապես զգուշացնի իր այցելության մասին, իսկ հիմա մենք տալիս ենք հնարավորություն առանց զգուշացնելու, ահազանգի դեպքում առանց ծանուցելու, գնալ և ստուգել»,- ասաց պատգամավորը՝ իր ծառայության տարիներից դրվագներ մեջբերելով․ «Պարոն Օհանյանն էր նախարարը, գիտեինք, որ տարին երկու անգամ գալիս են ստուգման։ Մեր ժամանակ օրը 10 000 դրամ էր տուն գնալը, էդ տուն գնացածները գալիս էին, թարմ պադշիվները կարում էինք, տանկերը պլպլացնում, սպասում էինք. նախարարը, ԳՇ պետը գալիս, տեսնում էին բոլորը շարված։ Երեկոյան էլ հեռուստատեսությամբ տեսնում էինք, թե տարածաշրջանի մարտունակ բանակն իրոք էդպես շարված է»,- ասաց Սիսիակ Գաբրիելյանը։