Շաբաթ, 06 սեպտեմբերի, 2025 թ.
|
Ստեփանակերտում`   +23 °C

Բարբադոսը և Պանաման իրենց դրոշներից կզրկեն ՌԴ-ի ստվերային նավատորմի ավելի քան 100 լցանավի

Բարբադոսը և Պանաման իրենց դրոշներից կզրկեն ՌԴ-ի ստվերային նավատորմի ավելի քան 100 լցանավի
1809
Հինգշաբթի, 23 հունվարի, 2025 թ., 21:49

Ծովային նավագնացության աշխարհում փոքր, բայց ազդեցիկ պետություններն սկսել են միանալ Ռուսաստանի դեմ արևմտյան առաջատար երկրների կողմից սահմանված պատժամիջոցներին։ Նրանք մտադիր են ռուսական նավթ տեղափոխող տասնյակ լցանավերից իրենց դրոշը հանել։

Բարբադոսի նավագնացության ռեգիստրը հայտնել է, որ մինչև հունվարի վերջ կպահանջվի 46 նավերից հեռացնել իրենց դրոշները, քանի որ նրանք ենթարկվել են Մեծ Բրիտանիայի պատժամիջոցներին, հայտնում է Bloomberg-ը։ Ռեեստրը հիմնված է Լոնդոնում և, ըստ նրա գլխավոր տնօրեն Ջովանի Չինիլոյի, Բարբադոսը Ռուսաստանի դեմ պատժամիջոցների ենթակա չէ, բայց հետևում է Մեծ Բրիտանիայի կանոններին երկու երկրների միջև լավ հարաբերությունները հաշվի առնելով: Միևնույն ժամանակ, Բարբադոսը չի հանի իր դրոշը ԱՄՆ-ի պատժամիջոցների տակ գտնվող լցանավերից, քանի դեռ դրանք չեն ենթարկվի Մեծ Բրիտանիայի պատժամիջոցներին: Բայց արգելված 46 նավերից 14-ը գտնվում են ԱՄՆ-ի սահմանափակումների տակ:

Պանամայի ծովային վարչությունն էլ վերջերս հայտարարեց, որ սկսել է իր գրանցամատյանից հանել 68 նավ, որոնք հայտնվել են ԱՄՆ-ի պատժամիջոցների թիրախում: Որոշումն ընդունվել է, երբ Պանաման անցած տարվա վերջին ընդունեց ԱՄՆ-ի, ԵՄ-ի, Մեծ Բրիտանիայի և ՄԱԿ-ի պատժամիջոցներին համապատասխանելու կանոն:

Բարբադոսը համարվում է աշխարհի ամենահեղինակավոր պետություններից մեկը նավերի գրանցում ապահովելու համար։ Այն երկրները, որոնք թույլ են տալիս նավերին կրել իրենց դրոշը, առանցքային դեր են խաղում ծովում անվտանգության չափանիշների ապահովման գործում: Պատժամիջոցների պատճառով ռուսական նավերն ավելի ու ավելի շատ են ստիպված լինում վերագրանցվել հեռավոր իրավասություններում և փոխել սեփականատերերին՝ իրենց հետևելը դժվարացնելու համար:

Equasis ծովային տվյալների բազայի համաձայն՝ Բարբադոսի գրանցամատյանից հանված որոշ նավեր արդեն գրանցված են այլ երկրներում, այդ թվում՝ աֆրիկյան երկրներում՝ Տանզանիա, Սան Տոմե, Պրինսիպ: Թեև նավերի մեծ մասը, եթե ոչ բոլորը, նոր վայրեր են գտնում գրանցման համար, անընդհատ թաքցնելու անհրաժեշտությունը մեծացնում է ծախսերը, բարդացնում նյութատեխնիկական ապահովումը և նավերին զրկում որակյալ ծառայություններից: