«100 դրամը դրեք, անցեք, ով հացի փող չունի, գա վերցնի»․ վարորդ

Բլոգեր Արթուր Չախոյանը ֆեյսբուքյան իր էջում տեսանյութ է հրապարակել, որտեղ ավտոբուսի վարորդն ուղևորներին ասում է․ «Ձեզնից 150 դրամ չեմ ուզում, 100 դրամ եք որոշել, դրեք անցեք, ով հացի փող չունի, գա վերցնի»։ Անդրադառնալով այս դրվագին Չախոյանը գրում է․ «Այս տեսանյութի հրապարակման նպատակը ցույց տալն է, թե ինչպես են մարդկանց վրա հոգեբանական ճնշում գործադրելով ռեկետի ենթարկում քաղաքացիներին՝ ստիպելով նրանց գործել իրենց կամքին հակառակ։
«Ով հացի փող չունի, գա վերցնի» նման արտահայտությունները իրականում կիրառվում են մարդկանց վրա հոգեբանական ճնշում գործելու համար, որպեսզի մարդիկ ամոթի ու խղճի զգացումից դրդված ընդունեն որոշումներ, որոնք նպաստում են որոշ մարդկանց հարստացմանը։
Վարորդի գործողություններն ամբողջովին հակաօրինական են, քանի որ նոյեմբերի 1-ից վարորդներն այլևս չեն ընդունում կանխիկ գումար, ուստի նմանատիպ վարքագիծը անթույլատրելի և դատապարտելի է։
Իրականում, նմանատիպ ոչ քաղաքակիրթ վարքագծով Երևանի քաղաքապետարանը հոգեբանական ճնշում է գործադրում տրանսպորտի թանկացման դեմ բոյկոտող քաղաքացիների վրա՝ ստիպելով նրանց ամոթի և խղճի զգացումից դրդված վճարել 150 դրամ։ Շատ դեպքերում քաղաքացիները, դեմ լինելով թանկացմանը, այդ ճնշման ազդեցության տակ, հակառակ իրենց կամքին, վճարում են 150 դրամը։
Ժողովուրդ ջան, տրանսպորտի թանկացման դեմ իրականացվող ձեր բոյկոտը օրինական է։ Դուք, օգտվելով ձեր սահմանադրական ազատ խոսքի իրավունքից, բոյկոտով արտահայտում եք ձեր անհամաձայնությունը տվյալ ոչ արդարացի և չհիմնավորված տրանսպորտի թանկացման որոշմանը։
Սիրելի՛ ժողովուրդ, առաջնորդվեք ձեր սեփական կարծիքով, այլ ոչ թե ուրիշների պարտադրանքի ներքո։ Մի թողեք, որ ամոթի կամ խղճի զգացումը ձեզ ստիպեն գործել ձեր կամքին հակառակ։ Եղեք ազատ ձեր որոշումներում»։