Դպրոցի 3-րդ հարկի պատուհանից ընկած երեխայի վիճակը կայուն է

Ինչպես հայտնել էինք այսօր Կոտայքի մարզի Ջրվեժ գյուղի միջնակարգ դպրոցի երրորդ հարկի պատուհանից երեխա էր ընկել, ով ծանր վիճակում տեղափոխվել էր հիվանդանոց։ Նրա առողջական վիճակն այս պահին կայուն է: Տեղեկությունը «Ֆակտոր»-ին հայտնել է դպրոցի նախկին տնօրեն, այժմ վարչատնտեսական հարցերի համակարգող Լիլիթ Վարդանյանը: «Երեխայի ոտքն է կոտրված, ճակատային հատվածը՝ վնասված: Պատուհանից թռել է, ոտքերի վրա իջել ու ընկել: Գիտակցության անկում չի եղել, ամբողջ ժամանակ ասել է՝ կներեք, ես չհասկացա, ես պիտի չանեի»,- ասել է նա:
Նշենք, որ դեպքի առնչությամբ նախաձեռնվել է քրեական վարույթ: Այս մասին լրատվականին է հայտնել Քննչական կոմիտեի մամուլի քարտուղար Կիմա Ավդալյանը: Վարույթը նախաձեռնվել է Քրեական օրենսգրքի 247-րդ հոդվածի 1-ին մասի հատկանիշներով, այն է՝ երեխայի դաստիարակության կամ խնամքի պարտականությունը չկատարելը կամ ոչ պատշաճ կատարելը: