«Մենք սա համարում ենք քաղաքական հետապնդում»․ Ռուբեն Մելիքյան

«Մենք սա համարում ենք քաղաքական հետապնդում»,- «Իմնեմնիմի» գործով այսօրվա դատական նիստից հետո ճեպազրույցում նշեց իրավապաշտպան Ռուբեն Մելիքյանը։
«Այսօր մեղադրող կողմը բերեց մեկ դատական ակտ, ըստ որի՝ խոսքը որպես խուլիգանություն է մեկնաբանվել։ Սա երկրորդ դեպքն է, բայց սա նույնպես վերաբերում է քաղաքական բովանդակություն ունեցող ընդդիմադիր խոսքին։

Այստեղ առկա է խտրականություն՝ քաղաքական հիմքերով։ Մենք գործ ունենք մեր քաղաքացիների խոսքի ազատությունը պաշտպանելու խնդրի հետ։ Խոսքի ազատությունը դիրքորոշումներ հայտնելու մասին է, երբեմն կարիք է լինում սուր արտահայտվել, սա ես համարում եմ մարդու իրավունքի դրսևորում»,- նշեց իրավապաշտպանը։

Հիշեցնենք, որ ըստ մեղադրանքի՝ Նարեկ Սամսոնյանն ու Վազգեն Սաղաթելյանը «տեղեկատվական և հաղորդակցական տեխնոլոգիաներն օգտագործելով, նշված հաղորդման ընթացքում հանդիսանալով տվյալ հաղորդման վարողներ, գիտակցելով բազմահազարանոց լսարանի առկայությունը, ուղղակի դիտավորությամբ կատարել են խուլիգանություն, այն է՝ հասարակության նկատմամբ անհարգալից և բարոյական նորմերի նկատմամբ բացահայտ արհամարհական վերաբերմունք դրսևորելով, հայհոյանքներ և անպարկեշտ արտահայտություններ են հնչեցրել ՀՀ կառավարության անդամների և իշխանության ներկայացուցիչների հասցեին»: