«Փաշինյանի ամենամեծ մեղքն այն է, որ շանս չի տալիս իրեն փոխարինողներին»․ Նարեկ Գալստյան

Լրագրող, «24Նյուզ»-ի տնօրեն Նարեկ Գալստյանի ֆեյսբուքյան գրառումը. «Նիկոլ Փաշինյանը վերջին երկու օրվա ընթացքում արդեն չորս անգամ դիմել է Ադրբեջանին՝ առաջարկելով կնքել խաղաղության պայմանագիր։ Սա արվում է այն պայմաններում, երբ Ադրբեջանը քարոզչական ֆոն է նախապատրաստում սահմանին հայկական բանակի կողմից իբր հրադադարի խախտումներ անելու մասին հայտարարություններով, որը բարձրացնում է ադրբեջանական հնարավոր ագրեսիայի հնարավորությունները։
Հիմա ուզում եմ հասկանալ, թե ո՞ւմ է դիմում Փաշինյանը՝ Ալիևի՞ն։ Ինչի Ալիևը չգիտի՞, որ դու պատրաստ ես ստորագրել այս պայմանագիր կոչեցյալը, որի սարսափելի հետևանքների մասին վերջին մի քանի օրերին արդեն հարյուրավոր մասնագիտական կարծիքներ են հնչեցվել։ Ո՞ւմ ես դիմում՝ միջազգային հանրությա՞նը։ Ո՞վ է այդ միջազգային հանրությունը՝ Ռուսաստա՞նը, ում հետ դու ամեն ինչ արել ես, որ հարաբերություն փչացնես, Եվրամիությո՞ւնը, որն Ալիևի վրա այնքան ազդեցություն ունի, ինչքան դու այսօր Արցախի վրա, Միացյալ Նահանգնե՞րը, որի նոր վարչակազմը թքած ունի Հայաստանի վրա էլ, Հարավային Կովկասի վրա էլ։ Ո՞ւմ ես դիմում։ Դու մտել ես Ադրբեջանի հետ երկկողմ բանակցությունների ֆորմատ, որը ենթադրում է միջնորդների, ուստի և Ալիևի վրա ազդեցության մեխանիզմների բացակայություն։ Ապալեգիտիմացնում ես հնարավոր պատերա՞զմը։ Իսկ ո՞ր մի պատերազմն է լեգիտիմ։ Սիրիայի գրավումը լեգիտի՞մ էր։ Ինչի՞ ես հասնում բացի մեր երկիրը ևս մի անգամ խայտառակելուց։
Փաշինյանի ամենամեծ մեղքն այն է, որ նա գիտի՝ վաղ թե ուշ գնալու է, բայց սեփական իշխանությունը երկարացնելու համար շանս չի տալիս նաև իրեն փոխարինողներին, այսինքն՝ շանս չի տալիս Հայաստանի Հանրապետությանը»: