«Էսկալացիայի որևէ հիմք չկա»․ Նիկոլ Փաշինյան

«Եթե վստահության խնդիր չլիներ, խաղաղության համաձայնագիրը վաղուց ստորագրված կլիներ, կամ համաձայնագրի կարիք չէր լինի։ Վստահության խնդիրներն են պատճառը, որ խաղաղության համաձայնագրի տեքստում կան կարգավորումներ նաև վստահության բարձրացման միջոցների վերաբերյալ։ Նկատի ունեմ՝ վստահության պակասը, չեմ կարծում, թե անակնկալ պետք է լինի այն միջավայրում, որում մենք ենք»,- այս մասին Հանրային հեռուստաընկերությանը տված հարցազրույցում ասել է ՀՀ վարչապետ Նիկոլ Փաշինյանը:

Նրա խոսքով՝ կողմերն ունեն իրենց պատկերացումները, թե ինչ հայտարարություններով պետք է առաջնորդվեն։ «Մեր պատկերացումն այն է, որ խաղաղության օրակարգը պետք է առաջ մղվի․․․ Մենք ունենք փաստաթուղթ, որը և՛ Հայաստանի Հանրապետության, և՛ Ադրբեջանի համար ընդունելի է։ Հաջորդ փուլը պետք է լինի այդ փաստաթղթի ստորագրումը»,- ընդգծել է վարչապետը։

Անդրադառնալով հարցին՝ նոր էսկալացիա հնարավո՞ր է, Փաշինյանը պատասխանել է․ «էսկալացիոն տրամաբանությամբ լուրերի տարածման նպատակն է քողարկել բուն լուրը։ Իսկ բուն լուրը հետևյալն է՝ համաձայնագրի տեքստը համաձայնեցված է և սպասում է ստորագրման․․․

Առավել ևս հիմա էսկալացիայի որևէ հիմք և հիմնավորում չկա»։