«Եթե հարցը դիտարկում ենք պատմական Հայաստանի տեսակետից, այո՛, կարող ենք ասել, որ դա զիջում էլ է, կապիտուլյացիա էլ է»․ Նիկոլ Փաշինյան

«Մեր ընդիմության տրամաբանությամբ ստացվում է, որ Ալիևը հայ ժողովրդի ամենամեծ պաշտպանն է, ասում են՝ ինչ ասել է Ալիևը, բերել ներառել եք այս փաստաթղթում, ու ձեր ասածներից ոչ մի բան չի ներառվել»,- այս մասին, ԱԺ-ում հայտարարեց ՔՊ-ական պատգամավոր Սիսակ Գաբրիելյանը:
«Մինչդեռ մենք տեսնում ենք պրոցես, որ մեր կողմը հայտարարում է, որ պատրաստ ենք հենց հիմա ստորագրել, Ալիևի կողմից մինչև այս պահը այդ համաձայնությունը չկա։

Ինձ մոտ տպավորություն է ստեղծվել, որ մեր ընդիմությունը կարծում է, թե այս բանակցությունները ինչ-որ զիջման մասին են, այսինքն՝ հայ ժողովուրդը ձեզ մանդատ է տվել գնալ Ադրբեջանից ինչ-որ զիջում պահանջել կամ զիջում կորզել։ Իմ տպավորությամբ՝ ձեր առաքելությունը, ձեր մանդատը ՀՀ 29 743 քառ․ կմ-ն է, ինքնիշխանությունն է և խաղաղությունը»,-ասաց Գաբրիելյանը և դիմելով վարչապետ Նիկոլ Փաշինյանին՝ նշեց. «Գոնե ընդհանրական սկզբունքային մակարդակով՝ կարո՞ղ եք ասել, թե այդ 17 կետերը ինչին են վերաբերում և արդյոք այդտեղ կա թեկուզ մի տոկոս վտանգ Հայաստանի Հանրապետությանը»:

Ի պատասխան՝ Փաշինյանը նշեց. «Նայած ինչի հետ մենք համեմատենք․ այսինքն՝ ո՞րն է մեր չափանիշը․․․ Եթե հարցը դիտարկում ենք պատմական Հայաստանի տեսակետից, այո՛, կարող ենք ասել, որ դա զիջում էլ է, կապիտուլյացիա էլ է: Եթե խոսքը վերաբերում է Հայաստանի Հանրապետության ինքնիշխան տարածքին, որևէ բան չի զիջվել: Ընդ որում՝ ոչ թե խաղաղության պայմանագրի տեսակետից, այլև ընդհանրապես»: