«Ինձ համար անընդունելի է առանց քաղաքական ակտիվ պայքարի սոցիալական որևէ խնդրի բարձրաձայնում»․ Ռոման Երիցյան
280
Երեկ, 16:18
Փաստաբան Ռոման Երիցյանի ֆեյսբուքյան գրառումը՝ կից տեսանյութով․ «Հաշվի առնելով այն, որ 2025 թվականի մարտի 29-ին կազմակերպված հավաքի և դրանից բխող հետագա արշավների գաղափարը բացառապես սոցիալական է, ուստի դրանց ակտիվորեն չեմ մասնակցում։ Հարգելի՛ արցախցիներ, ես անընդունելի եմ համարում ՀՀ իշխանության դեմ չպայքարելու որևէ գաղափար։ Ինձ համար առավել քան անընդունելի է առանց քաղաքական ակտիվ պայքարի սոցիալական որևէ խնդրի բարձրաձայնում՝ թեկուզև հավաք կազմակերպելու միջոցով։ Ըստ այդմ, հաջողություն եմ մաղթում պայքարի բոլոր մասնակիցներին և մասնագիտական հնարավորություններիս սահմաններում օգնության պատրաստակամություն հայտնում նրանց։ Այնուամենայնիվ, ՀՀ ներկայիս իշխանություններից անձամբ ես որևէ սպասելիք չունեմ։ Վստահ եմ, որ այս իշխանություններին արցախցիների խնդիրները չեն հետաքրքրում, հետևաբար նրանց առջև դրանք խնդրանքի կարգով բարձրացնելն անտրամաբանական է և իմաստազուրկ։ Աջակցության ծրագիր երկարաձգելով կամ որևէ այլ սոցիալական խնդիր լուծելով նրանք կհետապնդեն բացառապես մարդկանց լռեցնելու նպատակ, իսկ լռելը կրկնում եմ՝ ինձ համար անընդունելի է։ Համախմբվել և քաղաքական ակտիվ դժգոհություն է պետք արտահայտել արցախցու վերադարձի իրավունքը ոտնահարելու, Արցախն Ադրբեջանի մաս համարելու և գերիների հարցերն անտեսելու պատճառով, իսկ մնացածը դեռ կհասցնենք։ Կրկնում եմ՝ սոցիալական, այդ թվում՝ աջակցության ծրագրերի երկարաձգման խնդիրները կարևոր են, բայց նման խնդիրների լուծում խնդրել այն իշխանությունից, որն իր վարած քաղաքականության համատեքստում հրաժարվում է լուծել անգամ արցախցի զինծառայողների բնակարանային ապահովման խնդիրը կամ վճարել նրանց չօգտագործված արձակուրդի, ինչպես նաև հանգստյան օրերով ծառայության ներգրավելու դիմաց գումարները, իմաստազուրկ է։ Իմաստազուրկ է և անտրամաբանական 50 հազար ամսական աջակցություն խնդրել այն իշխանությունից, որը բառի բուն իմաստով հափշտակել է արցախցիների կուտակային կենսաթոշակները։ Անընդունելի է բնակարանային ապահովման խնդրանքով դիմել այն իշխանությանը, որը մինչև հիմա որևէ ռեալ աջակցություն չի ցուցաբերել անգամ բենզինի պայթունի հետևանքով մահացած հարյուրավոր քաղաքացիների ընտանիքներին։ Ասեմ ավելին, եթե անգամ հեքիաթային պատկերացմամբ ենթադրենք, որ արցախցիների բոլոր սոցիալական խնդիրները ՀՀ իշխանության կողմից լուծվել են, ապա միևնույն է, անձամբ ես շարունակելու եմ նրանց դեմ պայքարել։ Պայքարելու եմ հարյուրավոր խոշտանգումներ անտեսելու, ապօրինի քրեական վարույթներ նախաձեռնելու, անձնաց անհիմն կալանավորելու և նման այլ երևույթների պատճառով։ Շարունակելու եմ պայքարել արցախցու վերադարձի իրավունքը ոտնահարելու, Արցախն Ադրբեջանի մաս համարելու և գերիների հարցերն անտեսելու պատճառով։ Ես քաղաքական գործիչ չեմ, փաստաբան եմ և հայրենազրկված արցախցի։ Իմ հայրենիքն այս իշխանությունը համարում է Արդբեջան, հետևաբար նրանց դեմ պայքարելուց երբևէ չեմ հրաժարվելու՝ անկախ առաջարկվող սոցիալական շոպլիկություններից»։
