«ԱԺ նախագահը չպետք է քննարկի նախաձեռնություն, որը կհակասի ՀՀ՝ եվրոպական ընտրությանը»․ Արման Բաբաջանյան

ԱԺ նախկին պատգամավոր Արման Բաբաջանյանի ֆեյսբուքյան գրառումը․ «Ազգային ժողովի նախագահի այցը Մոսկվա տեղի է ունենում այն փուլում, երբ Հայաստանի Հանրապետությունն օրենքով ազդարարել է Եվրամիությանն անդամակցության գործընթացի մեկնարկը։
Ալեն Սիմոնյանի ճշգրիտ, պատասխանատու և արժանապատիվ ուղերձը հետևյալն է՝ Հայաստանը կատարել է պատմական քաղաքակրթական ընտրություն, որը կոչվում է՝ ԵՄ անդամակցություն։ Եվ այս ուղին անշրջելի է ու անբեկանելի։
ԱԺ նախագահը չպետք է ստորագրի, չպետք է միանա, չպետք է նույնիսկ քննարկի որևէ հռչակագիր կամ նախաձեռնություն, որը նույնիսկ նվազագույն չափով հակասում է Հայաստանի եվրոպական ընտրությանը կամ կասկածի տակ է դնում ԵՄ-ի, ՆԱՏՕ-ի կամ Արևմուտքի դերն ու նպատակները։
Քաղաքական հստակությունն ու ռազմավարական հաստատակամությունը պետության կայունության ու միջազգային վստահելիության առանցքն են։
Հայաստանը կայացրել է իր ընտրությունը՝ արժանապատիվ, ինքնիշխան, եվրոպական ապագայի օգտին։ Հիմա այդ ընտրությունը պետք է օրեցօր ամրապնդել անդուլ աշխատանքով, ելույթներով, հայտարարություններով և հարցազրույցներով։ Մոսկվայում՝ հատկապես»։