«44-օրյա պատերազմի վերաբերյալ հանձնաժողովի զեկույցը կհրապարակվի սեպտեմբերի վերջին»․ Անդրանիկ Քոչարյան

«44-օրյա պատերազմի հանգամանքներն ուսումնասիրող քննիչ հանձնաժողովի զեկույցը կներկայացվի սեպտեմբերի 27-ին հետևող ԱԺ լիագումար նիստի առաջին կամ երկրորդ օրը»,- ԱԺ-ում լրագրողների հետ զրույցում հայտնեց Պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը։

«Քանի որ սեպտեմբերիի 27-ը շաբաթ օր է, իսկ ամսի 30-ին կսկսվի ԱԺ լիագումար նիստը, հարցը կներառվի խորհրդի նիստում ու օրը վերջնական կորոշվի»,- նշեց նա։

Անդրանիկ Քոչարյանի խոսքով ճիշտ է, որ զեկույցն այդ օրերին ներկայացվի, ինչն, ըստ իրեն, սիմվոլիկ է։

«Գաղտնիության ծավալն այնքան մեծ է, որ նիստը կարող է դռնփակ լինել, բայց զեկույցը հասանելի կլինի պատկան մարմիններին, պետական ինստիտուտներին, որ եզրահանգումներ անեն»,- ասաց Քոչարյանը։