«Խելացի աշխատանքի դեպքում Ալիևի զավթողական ծրագիրը կարելի է ուղղել նրա դեմ»․ Տաթևիկ Հայրապետյան

Ադրբեջանագետ Տաթևիկ Հայրապետյանի ֆեյսբուքյան գրառումը․ «Մի խաբվեք քարոզչությանը, թե իբր Արցախն ու Արցախի հարցն էր խաղաղության խոչընդոտը։
Ադրբեջանի ներկայիս ղեկավարը «Արևմտյան Ադրբեջան» զավթողական կոնցեպտը շրջանառության մեջ է դրել Փաշինյանի կողմից Արցախն Ադրբեջանի մաս ճանաչելուց երկու ամիս անց:
Նայենք չոր փաստերին․
«Ապագայում անհրաժեշտ է ստեղծել այնպիսի աշխատանքներ, որպեսզի դրանք անընդհատ, հետևողական ձևով ապացուցեն, որ այն հողերը, որտեղ այժմ գտնվում է
Հայաստանը, պատկանում են Ադրբեջանին։ Մենք պետք է սա անենք։ Մենք պետք է ճանապարհ բացենք ապագա սերունդների համար․․․»,- Հեյդար Ալիև, 1999 թվական։
Այս հարցին Իլհամ Ալիևը առաջին անգամ անդրադարձավ 2022 թվականին դեկտեմբերին՝ Փաշինյանի կողմից Արցախն Ադրբեջանի մաս ճանաչելուց երկու ամիս անց, որտեղ բառացի ասել է․ «Ես կարծում եմ, որ դրան զուգահեռ մենք պետք է համատեղ մշակենք Արևմտյան Ադրբեջան վերադառնալու հայեցակարգ։ Այս հարցը մեր օրակարգում է հենց հիմա՝ ղարաբաղյան հիմնախնդրի լուծումից հետո։ Իհարկե, այս մասին խոսելը դեռ վաղ է, քանի դեռ չի լուծվել ղարաբաղյան հակամարտությունը։ Բայց այսօր, իմ կարծիքով, պետք չէ ժամանակ կորցնել․․․»՝ նաև նշելով՝ «Այս տարածքում Հայաստան երբեք չի եղել։ Այսօրվա Հայաստանը մեր հողն է»:
Ինչպես տեսնում եք Արցախն Ադրբեջանի մաս ճանաչելն ու դա «խաղաղության օրակարգ» կոչելը Ալիևին հիշեցրել է 23 տարի առաջ հոր թողած զավթողական ծրագրերի պատգամը, որն այժմ իրականացվում է ակտիվ քարոզչական քաղաքականությամբ։ Կրկնում եմ սա զավթողական ծրագիր է, որը խելացի աշխատանքի դեպքում կարելի է ուղղելի Ալիևի դեմ»։