«Վարկը կմարվի, մարդիկ սև ցուցակից դուրս կգան, բայց ռեպուտացիան չի վերականգնվի»․ Նիկոլ Փաշինյան

Կառավարությունն այսօրվա նիստում ընդունեց որոշում՝ անհուսալի վարկեր ունեցող անձանց տնտեսական ակտիվության խթանման միջոցառման շարունակականությունը 2025 թվականի ապրիլ և մայիս ամիսների համար ապահովելու նպատակով 2025 թվականի պետական բյուջեով նախատեսված Հարկային եկամուտներից և պետական տուրքերից հատկացնել 209 մլն դրամ:
Նախագիծը ներկայացրեց Աշխատանքի և սոցիալական հարցերի նախարարի տեղակալ Տաթևիկ Ստեփանյանը։
Համաձայն որոշման, աջակցությունը հատկացվեց վարկառու այն ֆիզիկական անձանց, որոնց բոլոր վարկերը 3 և ավելի տարի դասակարգված է անհուսալի դասով, և, միևնույն ժամանակ, մայր գումարի գծով պարտավորությունը չի գերազանցում 1 մլն դրամը կամ դրան համարժեք արտարժույթը։ Շահառուին տրվում է ֆինանսական աջակցություն՝ շահառուի աշխատավարձից և դրան հավասարեցված վճարումներից հաշվարկված եկամտային հարկի գումարի 100%-ի չափով, որն ուղղվում է անհուսալի վարկային պարտավորության մարմանը: Աջակցությունը տրամադրվում է առավելագույնը 24 ամիս ժամկետով՝ սկսած շահառու ճանաչվելուն հաջորդող ամսվա 1-ից, բայց ոչ ավելի, քան անհուսալի վարկի ամբողջական մարումը։

Դիմումների ընդունման ժամկետ է սահմանվել 2025 թվականի փետրվարի 1-ից 2026 թվականի հունվարի 31-ը։

Համաձայն նախագծի՝ գնահատականներում հաշվի են առնվել հետևյալ հանգամանքները․ «2025 թվականի փետրվար ամսում ներկայացված դիմումներով շահառու է ճանաչվել 1896 անձ, որոնց վարկային պարտավորությունները 2025 թվականի մարտ ամսում մարելու նպատակով Հայաստանի Հանրապետության կառավարության 2025 թվականի մարտի 6-ի N 264-Ն որոշմամբ հատկացված 121․5 մլն դրամ գումարից հատկացվել է շուրջ 70,625.0 հազար դրամ (աջակցությունը տրամադրվում է շահառու ճանաչվելուն հաջորդող ամսվա 1-ից): 1 շահառուի գծով հատկացված գումարը կազմել է 37,249 դրամ։

Ըստ այդմ, հատկացված գումարի մնացորդը կազմում է 50,875.0 հազար դրամ (121,500,000-70,624,000):

2025 թվականի մարտ ամսում (փետրվար ամսվա դիմումներով) աջակցություն ստացած 1896 շահառուների վարկային պարտավորությունները նաև 2025 թվականի ապրիլ և մայիս ամիսների համար մարելու նպատակով անհրաժեշտ գումարի չափը կազմում է 141,250.0 հազար դրամ (70,625 x 2 ամիս):

Միաժամանակ, 2025 թվականի մարտ ամսվա ընթացքում դիմումներով շահառու է ճանաչվել 1072 անձ, որոնց միջոցառման շրջանակներում աջակցություն պետք է տրամադրվի 2025 թվականի ապրիլ ամսից: Այդ շահառուների վարկային պարտավորությունները 2025 թվականի ապրիլ և մայիս ամիսների համար մարելու նպատակով անհրաժեշտ գումարի չափը կազմում է շուրջ 62,810.0 հազար դրամ (31,405.0*2): Եկամտային հարկի գումարը գնահատվել է 25.03.2025 դրությամբ ՊԵԿ բազայում առկա տեղեկատվությամբ։

Միջոցառման իրականացման ընթացքում ենթադրվում է նաև, որ 2025 թվականի ապրիլ ամսվա ընթացքում շուրջ 1500 նոր անձ կդառնա միջոցառման շահառու՝ 2025 թվականի մայիս ամսից: Եվ նրանց վարկային պարտավորությունները 2025 թվականի մայիս ամսվա համար մարելու նպատակով անհրաժեշտ գումարի չափը կկազմի շուրջ 50 մլն դրամ:

Հաշվարկի հիմքում հաշվի է առնվել այն հանգամանքը, որ 2025 թվականի փետրվար և մարտ ամիսների ընթացքում դիմած շահառուների միջին թիվը կազմում է շուրջ 1500 անձ ((1896+1072)/2): Բացի դրանից, ապրիլ ամսվա ընթացքում նախատեսվում է իրականացնել օրենսդրական փոփոխություն, որով շահառու կարող են դառնալ այն անձինք, ում վերաբերյալ տվյալները օրենսդրությամբ սահմանված են, որպես սահմանափակ։

2025 թվականի ապրիլ ամսվա ընթացքում դիմումներով շահառու ճանաչվելիք 1500 անձ միջոցառման շրջանակներում տրամադրվելիք աջակցությունը կկազմի 55,874.0 հազար դրամ (1500*37,249 դրամ)։

Այսպիսով, միջոցառման շահառուների վարկային պարտավորությունները 2025 թվականի ապրիլ և մայիս ամիսների համար մարելու նպատակով անհրաժեշտ ֆինանսավորման չափը կազմում է շուրջ 209,032 հազար դրամ (141,250+62,810+55,847-50,875)՝ հաշվի առնելով 50,875.0 հազար դրամ մնացորդը»։

Աշխատանքի և սոցիալական հարցերի նախարարի տեղակալ՝ Տաթևիկ Ստեփանյանը նշեց, որ 07.04.2025թ. դրությամբ որոշմամբ հաստատված միջոցառումից օգտվելու համար ներկայացված դիմումներից շուրջ 3200-ը հաստատվել են, որոնցից 680-ը վերջին 3 ամսում ձեռք են բերել ֆորմալ զբաղվածություն:
«Այնուամենայնիվ բանկային համակարգում քաղաքացու վարկային պատմությունը չի ջնջվելու և հաջորդ անգամ վարկ տալիս բանկերն ավելի զգուշավոր են լինելու։ Որևէ կոմպենսացիայով ռեպուտացիան չես վերականգնի»,- նշեց Նիկոլ Փաշինյանը՝ հավելելով, որ վարկը կմարվի, մարդիկ սև ցուցակից դուրս կգան, բայց շատ ջանքեր պիտի գործադրեն, որ իրենց նկատմամբ վստահությունը վերականգնվի։