«Նիկոլական մամլիչի ուղտը չոքեց նաև Պողոսյան Հունանի դռանը»․ Արմեն Հովասափյան

ՀՀԿ խորհրդի անդամ Արմեն Հովասափյանի ֆեյսբուքյան գրառումը․ «Ժամանակին ոստիկանությունում մի հայտնի գեներալ կար՝ Հունան Պողոսյան անուն ազգանունով. համակարգում լավ ծառայում էր, իսկական «կադրավիկ» էր՝ պաշտպանում էր պետության շահերը: Սակայն 2018-ի վակխանալիայի ընթացքում աստիճանաբար «գունափոխվեց» ու, Նիկոլի գցաց խայծը կուլ տալով, որոշեց, որ պիտի համագործակցի իշխանությունը ցավթածների հետ:
Մոռանալով իր համազգեստն ու ուսադիրը՝ Պողոսյանը «դըմփ-դըմփ հու» էր անում Կապանում, երբ իրեն Նիկոլը Սյունիքի մարզպետ էր նշանակում՝ հոգու խորքում թերևս իմանալով, որ միևնույնն է, մի օր այդ ամենն իր դեմ է աշխատելու, քանի որ Նիկոլի հիշաչար տեսակը ոչինչ ու ոչ ոքի չի ներում ու չի մոռանում:
Այսօր արդեն հայտնի դարձավ, որ Պողոսյանը, որդին ու կինը 2025թ. մայիսի 8-ին հրավիրվել են Գլխավոր դատախազության ապօրինի ծագում ունեցող գույքի բռնագանձման գործերով վարչություն: Նրանց պատկանող գույքի առնչությամբ իրականացվել է ուսումնասիրություն: Ասել է թե, նիկոլական մամլիչի ուղտը չոքեց նաև Պողոսյան Հունանի դռանը:
Նման դեպքերում փաստ է այն, որ Պողոսյանը, ում նշանակման ժամանակ Նիկոլը հայտարարում էր, թե «երկրում տեղի ունեցած հեղափոխության արդյունքում որևէ մեկը իր կյանքն ավարտված չպետք է համարի», պետք է առերեսվի այն իրականության հետ, որ իր համար հետաքրքիր կյանքը նոր է սկսվում:
Եվ սա հերթական վկայությունն է այն ճշմարտության, որ ցանկացած ոք, ով ժամանակավոր հարմարության ու անձնական շահի համար հրաժարվում է պետական մտածողությունից, համակարգից ու գործընկերներից՝ ի վերջո միայնակ է մնում «հեղափոխական» մեխանիզմի ճզմիչի տակ։ Փաշինյանի մոտ ոչ մի անձ չի կարող «պլստալ»՝ թեկուզ ժամանակավոր օգտակար լինի։ Հավատարմությունը նրա համար գործիք է, ոչ արժեք, իսկ մեխանիզմը սնվում է հենց սեփական սպասարկուներով»։