«Ինչ նախագծում եք՝ խոտան է, ասֆալտից մինչև կրթական համակարգ»․ Լիլիթ Գալստյան

«Կառավարությունն օրենսդրական նախաձեռնությունները այնպիսի որակով է ուղարկում ԱԺ, որն, իմ կարծիքով, անարգանք է օրենսդրական գործունեության նկատմամբ»,- ԱԺ ելույթի ժամանակ ասաց «Հայաստան» խմբակցության պատգամավոր Լիլիթ Գալստյանը՝ անդրադառնալով ԿԳՄՍ նախարարության ներկայացրած «Մշակութային աճուրդների մասին» օրենքի նախագծին։ «Նախագիծը կարող եմ որակել որպես խոտան։ Ընդ որում՝ սա ներկայացված է այն գերատեսչության կողմից, որը պատասխանատու է կրթական քաղաքականության համար»,- ասաց Գալստյանը՝ թվարկելով թե՛ քերականական սխալները, թե՛ իրավական։
«Նախագծի հիմնավորումը լեցուն է քերականական, շարահյուսական սխալներով, անավարտ նախադասություններով։ Սա հակասական հաստատումների և անտրամաբանական շարադրանքի մի բառակույտ է, որը չի հաղթահարի 8-րդ դասարանի հայոց լեզվի քերականության անցողիկ շեմը»,- ասաց նա՝ հավելելով․ «Ինչ նախագծում եք՝ խոտան է, ասֆալտից մինչև կրթական համակարգ և մշակութային կառավարում»։ «Երանի հին ժամանակներին»,- արձագանքեց ԱԺ փոխխոսնակ Հակոբ Արշակյանը։