«Արգիճի գետ` Սևանա լիճ թափվող ամենաերկար ու ջրառատ գետը». Լևոն Ազիզյան

«Հիդրոօդերևութաբանության և մոնիթորինգի» կենտրոն ՊՈԱԿ-ի տնօրեն Լևոն Ազիզյանը ֆեյսբուքյան էջում տեսանյութ է հրապարակել՝ կից գրելով. «Արգիճի գետ
Սևանա լիճն են թափվում շուրջ 30 գետ և գետակ, որոնցից ամենամեծը՝ ինչպես երկարությամբ, այնպես էլ ջրառատությամբ, Արգիճի գետն է։
*Երկարությունը՝ 51 կմ,
*Ջրհավաք ավազանի տարածքը՝ 384 կմ²,
*Գալարականության աստիճանով Արգիճին ՀՀ ամենագալարուն գետերից է։
Արգիճին սկիզբ է առնում Գեղարքունիքի մարզի Գնդասար լեռան հյուսիսային լանջերից՝ մոտ 2560 մ բարձրությունից։ Գետը դանդաղ հոսքով հոսում է համանուն ընդարձակ գոգավորության ճահճոտ տարածքներով՝ առաջացնելով գետագալարներ։ Հիմնական հոսքի ուղղությունը հյուսիսային է։ Արմաղան հանգած հրաբխային սարի արևելյան ստորոտում այն մտնում է լավայական ծագում ունեցող ոչ խոր ձորի մեջ և վերջնականապես թափվում Սևանա լիճը։
Սնման աղբյուրները խառը բնույթ ունեն՝
*Ձնաանձրևային՝ 62.0%,
*Ստորերկրյա՝ 38.0%
*Ջրային ռեժիմը բնութագրվում է գարնանային վարարումներով, որոնք դիտվում են ապրիլից մինչև հունիս և առավելագույնին հասնում մայիսին։ Ամռան ամիսներին երբեմն արձանագրվում են կարճաժամկետ հորդացումներ։
Բացարձակ առավելագույն ծախսը՝ 265 մ³/վրկ (դիտվել է 1938 թ․)
Միջին տարեկան ծախսը՝ 5.38 մ³/վրկ
Տարեկան հոսքի ծավալը՝ 169.7 մլն մ³
Տեսանյութը՝ @another_armenia»: