«Եկեղեցին շարունակո՞ւմ է պահանջել Փաշինյանի հրաժարականը»․ հարց՝ Տ. Նաթան արքեպիսկոպոս Հովհաննիսյանին

«Հարաբերություններն այնպիսին են, ինչպիսին կարող են լինել աշխատանքային հարաբերությունները»,- Սարդարապատի հուշահամալիրում լրագրողների հետ զրույցում ասաց Մայր Աթոռի Արտաքին հարաբերությունների և արարողակարգի բաժնի տնօրեն Տեր Նաթան արքեպիսկոպոս Հովհաննիսյանը՝ անդրադառնալով իշխանության ու Մայր Աթոռի հարաբերություններին։ Նշենք, որ այս տարի ևս հոգևոր դասը հուշահամալիր էր եկել կառավարության անդամների այցից հետո։

Դիտարկմանը, թե Վեհափառ Հայրապետը չի մասնակցում պետական արարողակարգերին, Սրբազանը պատասխանեց․ «Եթե Վեհափառ Հայրապետն իշխանության հետ չի մասնակցում պետական արարողակարգերին, ուրեմն ունի իր պատճառները»։
Հարցին՝ եկեղեցին շարունակո՞ւմ է պահանջել Փաշինյանի հրաժարականը, պատասխանեց. «Եկեղեցին իր կարծիքը երբևէ չի փոխել, ինչո՞ւ եք ամեն անգամ նույն հարցը տալիս, նոր հարցեր մտածեք․․․Եկեղեցին մշտապես ջանք է դնում, որ ազգը միավորված ու միահամուռ լինի։ Պատմության ընթացքում շատ փորձեր են եղել՝ ծնկի բերելու եկեղեցին, բայց եկեղեցին երբեք ծնկի չի իջել։ Եկեղեցին երբեք ծնկի չի իջնի մարդու առջև։ Վազգեն կաթողիկոսը շատ լավ խոսք ուներ՝ «եթե դու չես ուզում ծնկի իջնել Աստծո առաջ, ստիպված կլինես մարդու առաջ ծնկի իջնել»,- ասաց Սրբազանը։
Նշենք, որ Վեհափառը Հայաստանում չէ, նա Բեռնում մասնակցում է միջազգային համաժողովի՝ նվիրված Արցախի հայկական հոգևոր և մշակութային ժառանգության պահպանությանը։