«Մի՛ քաղեք ծաղիկներ». «Զանգեզուր կենսոլորտային համալիր»

Զբոսաշրջային հոսքի կտրուկ աճով պայմանավորված՝ «Զանգեզուր կենսոլորտային համալիր» ՊՈԱԿ-ը հրապարակել է կոչ արշավականներին՝ խնդրելով բոլորին պահպանել էկոհամակարգի նուրբ հավասարակշռությունը և խստորեն խուսափել բույսերի, հատկապես ծաղիկների մասսայական հավաքից։

«Բնության յուրաքանչյուր տարր կարևոր է։

Էկոհամակարգի որևէ բաղադրիչի անհետացումը կարող է խաթարել ամբողջական հավասարակշռությունը՝ հանգեցնելով շրջակա միջավայրի լրջագույն փոփոխությունների։

Օրինակ՝

Ծաղիկները սննդի աղբյուր են որոշ միջատների համար,

Միջատներն էլ՝ թռչունների, մանր գիշատիչների և սողունների,

Իսկ նրանք՝ խոշոր գիշատիչների։

Այս շղթայի խզումը կարող է ունենալ անուղղելի հետևանքներ ինչպես բնության, այնպես էլ մարդու կենսամակարդակի վրա։

Խնդրում ենք լինել պատասխանատու և հոգատար։

Մի՛ քաղեք ծաղիկներ։

Մի՛ խախտեք կենդանի արարածների բնակավայրերը։

Մաքուր, առողջ և կայուն բնություն ունենալու գրավականը՝ նրա բնական անխաթարությունն է։ Եկեք միասին պահպանենք մեր բնության հրաշալիքներն ու դրանք անխաթար փոխանցենք նաև ապագա սերունդներին»,-ասված է կոչ-հորդորում։

Շնորհակալություն համագործակցության և բնության հանդեպ ձեր հոգատար վերաբերմունքի համար»,- հորդորում է ՊՈԱԿ-ը։