«Նիկոլ Փաշինյանը երևի թե ուզում է Եկեղեցին ուզուրպացնել և դառնալ միապետ»․ Արթուր Վանեցյան

«Ես չեմ ուզում մտնել այդ խոսակցության մեջ։ Եկեղեցին ինքը պետք է լուծի իր հարցերը, չեն կարող եկեղեցական հարցերը լուծվել Եկեղեցուց դուրս»,- այս մասին «Հանրային»-ի եթերում նշեց ԱԱԾ նախկին տնօրեն, «Հայրենիք» կուսակցության նախագահ Արթուր Վանեցյանը՝ անդրադառնալով Ամենայն Հայոց Կաթողիկոսի զավակ ունենալ-չունենալու հարցի շուրջ ծավալվող բանավեճին և դիտարկմանը, թե այդ թեմայի ընդդիմախոսները, Կաթողիկոսին սատարողները չեն պատապատասխանում այդ հարցին՝ Կաթողիկոսը զավակ ունի՞, թե՞ չունի։

«Իսկ ո՞վ է դիմել Եկեղեցուն և պարզաբանում չի ստացել։ Չես հասկանում Նիկոլ Փաշինյանը բլոգեր է, թե վարչապետ, ամեն առավոտ մի գրառում է անում, որով մեղադրանքներ, սպառնալիքներ, շանտաժ․․․ Եթե հարց ունի և այդքան մտածում է Եկեղեցու մասին, դրա ձևը կա․ նամակ գրել Եկեղեցական խորհրդին և խնդրել այդ հարցը լուծել։ Իսկ այն, ինչ անում է հիմա Նիկոլ Փաշինյանը, դա ուղղակի Եկեղեցու հեղինակության հետ խաղալու հերթական փորձն է, Եկեղեցին ուզուրպացնելու փորձ է․ Նիկոլ Փաշինյանը, երևի թե, ուզում է դառնալ միապետ, ուզում է Եկեղեցին ուզուրպացնել և դառնալ ամենայն հայոց վարչապետ»։