«Այն, ինչ կատարվում է Իրանի շուրջ, դուրս է եկել լոկ միջուկային արիշ-վերիշներից». Արման Աբովյան

ԱԺ նախկին պատգամավոր Արման Աբովյանի ֆեյսբուքյան գրառումը․ «Իրանը պատրաստ է համաձայնագիր կնքել, որը կերաշխավորի միջուկային զենքի բացակայությունը, հայտարարել է Իրանի ԱԳ նախարարը:
Նա պնդում է, որ Թեհրանը միջուկային զենքի տարածումն արգելելու դիրքորոշում ունի։
Աբբաս Արաղչին միաժամանակ ընդգծել է, որ եթե պայմանագրի նպատակն Իրանին օրինական միջուկային իրավունքներից զրկելն է, ապա երկիրը դրան պատրաստ չէ:
Հիշեցնեմ պարզապես, որ սա Իրանի դիրքորոշումն է եղել մինչև Իսրայելի հարձակումները և ըստ էության մենք նոր բան չլսեցինք։
Իսրայելի և անգլոսաքսոնական ուժային կենտրոնների համար Իրանի միջուկային քեյսի չեզոքացումն, իհարկե, ունի կարևոր նշանակություն, բայց այն, ինչ կատարվում է այսօր Իրանի շուրջ, արդեն դուրս է եկել լոկ միջուկային արիշ-վերիշներից։ Սա նոր աշխարհաքաղաքական իրողությունների ձևավորում է, որտեղ Իրանը պետք է լինի մաքսիմալ թուլացած, իրական մասնատման հեռանկարների ներքո։
Ինչևէ, որքան արագ այս ամենը վերջանա, այդքան մեզ՝ հայերիս, սա ձեռնտու է»։