«Փոխարենը թող մտածի՝ ոնց 5 րոպեն մեկ հոսանքը չանջատվի»․ Վահագն Ալեքսանյան

«Կուսակրոնության ուխտը խախտած, երդմնազանց և ուխտադրույժ հոգևորականների պաշտպանության արշավին է միացել նաև ՀԷՑ-ի սեփականատերը՝ «Տաշիրի» Սամվել Կարապետյանը»,- ԱԺ-ում հայտարարությունների ժամին ասաց ՔՊ-ական պատգամավոր Վահագն Ալեքսանյանը։
«Իմ համար չափազանց զարմանալի է, մի երկրում, որտեղ 5 րոպեն մեկ մարդկանց տներում հոսանք է անջատվում, էդ երկրում ՀԷՑ-ի սեփականատերն առնվազն պետք է մտածեր՝ ոնց անի՝ ծառայությունների որակը բարձրացնի։ Մեկնաբանությունը շատ հստակ է՝ վերջին շրջանում լուրջ քննարկվել է ՀԷՑ-ի նման վարքագծին որոշակի գնահատական տալու հարցը։ Ինչպես մի շարք այլ գործիչներ, պարոն Կարապետյանը ևս որոշել է որոշակի քաղաքական պաշտպանվածություն գտնի կիսաքաղաքական հայտարարություններով։ Ինքը կոնկրետ գիտի՝ ինչ հարց է քննարկվում կառավարությունում, ԱԺ-ում և թե ինչ մակարդակի է հասել սպառողների դժգոհությունը»,- ասաց Ալեքսանյանը։
ՔՊ-ական Հայկ Կոնջորյանը ևս արձագանքեց Սամվել Կարապետյանի հայտարարությանը, նշելով, որ նա երկրի ամենաատելի կառույցի ղեկավարն է և որ պետք է ուղղակի «լռի ու վեր ընկնի տեղը»:
Հիշեցնենք՝ գործարար Սամվել Կարապետյանն անդրադառնալով իշխանության՝ եկեղեցու դեմ արշավին՝ ասել էր. «Ի՞նչ կարծիք պետք է ունենամ, եթե մի փոքրիկ խմբակ, մոռանալով հայոց պատմությունը, հարձակվել է հայ եկեղեցու վրա... Քանի որ ես միշտ եղել եմ հայոց եկեղեցու կողքին, ունենալու եմ անմիջական մասնակցություն: Եթե չհաջողվի քաղաքական գործիչներին, ուրեմն մենք էլ մեր ձևով ենք մասնակցելու էդ ամեն ինչին»: