Պոլսի պատրիարքարանը Նիկոլ Փաշինյանին չի ընդունել

Պոլսի հայոց պատրիարք Սահակ արքեպիսկոպոսի հետ ՀՀ վարչապետ Նիկոլ Փաշինյանի հանդիպում չի կայացել։ Այս մասին հայտնում է «Փաստինֆո»-ն՝ նշելով, որ տեղեկացել է պոլսահայ համայնքի ներկայացուցիչներից։

«Մեր աղբյուրների փոխանցմամբ՝ Նիկոլ Փաշինյանի և պոլսահայ համայնքի անդամների միջև կայացած հանդիպմանը Հայ Առաքելական եկեղեցու Պոլսի պատրիարքարանը չի մասնակցել։ Թեև առանձին անձանց ուղղված հրավերներ եղել են, սակայն շատերը հանդիպմանը չեն մասնակցել։
Հանդիպման մասնակիցների թիվը, ըստ նույն աղբյուրների, մեծ չի եղել։ Դատելով նաև Փաշինյանի թելեգրամյան էջում հրապարակված տեսանյութերից և լուսանկարներից՝ միջոցառումը կազմակերպվել է սահմանափակ թվով անձանց մասնակցությամբ։ Ստամբուլից ստացված տեղեկությունների համաձայն՝ հայ համայնքի հետ հանդիպումից հետո վարչապետ Փաշինյանը գնացել է Սուրբ Հարության եկեղեցի, որը գտնվում է Պոլսի պատրիարքարանի անմիջապես դիմաց։ Սակայն պատրիարքարանի դռները եղել են փակ, և հանդիպում պատրիարքի հետ տեղի չի ունեցել»,- նշված է հրապարակման մեջ։