«Առնվազն դավաճանության մեղադրանքով պետք է Նիկոլ Փաշինյանին կալանավորեն»․ Իշխան Սաղաթելյան

«Նիկոլն իր տերերին դուր գալու համար փորձում է ևս մեկ անգամ փաստել նրանց ցանկությունը կատարելու իր պատրաստակամությունը»,- լրագրողների հետ զրույցում այս տեսակետը հայտնեց ԱԺ ընդդիմադիր պատգամավոր Իշխան Սաղաթելյանը՝ ընդգծելով, որ այս պահին, երբ Նիկոլ Փաշինյանը Ստամբուլում է, ՀՀ-ում ձերբակալումներն ամենևին էլ պատահական չեն։

Նրա խոսքով՝ երկու տասնյակից ավելի ակտիվ ՀՅԴ-ականներ և «Սրբազան պայքար» շարժման մասնակիցներ են բերման ենթարկվել, նաև կան այնպիսիք, որոնց գտնվելու վայրը հայտնի չէ։

«Եթե ոստիկանությունը, դատախազությունը, ԱԱԾ-ն հետաքրքրված են մեր երկրում հասարակական կարգի, անվտանգության և տարածքային ամբողջականության պահպանմամբ, ապա պետք է Նիկոլ Փաշինյանին ձերբակալեն․ առնվազն դավաճանություն կատարելու մեղադրանքով գործ պետք է հարուցեն և կալանավորեն նրան և ոչ թե մարդկանց, որոնք պայքարում են իրենց հայրենիքի և ժողովրդի համար»,- ընդգծեց Սաղաթելյանը։