«Նիկոլի որոշածը պարզ է. ներքին դիմադրության տոտալ չեզոքացում, որպեսզի Էրդողանը չանհանգստանա»․ Հրանտ Մելիք-Շահնազարյան

Քաղաքագետ Հրանտ Մելիք-Շահնազարյանի ֆեյսբուքյան գրառումը․ «Նիկոլի որոշածը պարզ է. ներքին դիմադրության տոտալ չեզոքացում։ Ինչո՞ւ է դա պետք Նիկոլին։ Ես հեռու եմ այն մտքից, որ այդ որոշումը միայն ներքաղաքական ենթատեքստ ունի։ Ցավոք, ներընդդիմադիր իրողություններն այնպիսինն են, որ իշխանություն պահելու համար Նիկոլը նման քայլերի գնալու անհրաժեշտություն չունի։
Այլ բան է արտաքին քաղաքականությունը։ Տարածաշրջանը լուրջ ցնցումների մեջ է, և ինչ փոփոխություն ասես՝ կարող է լինել։ Կասկածից վեր է՝ առաջին իսկ հնարավորության դեպքում Թուրքիան և Ադրբեջանը օգտվելու են Իրանի՝ թեկուզ և քիչ թուլացումից և կյանքի կոչեն իրենց վաղեմի աշխարհաքաղաքական ու աշխարհատնտեսական ծրագրերը։ Սյունիքի տարածքով թյուրքական միջանցքը այդ ծրագրերի չնչին մասն է միայն։ Խաղը շատ ավելի հեռու գնացող նպատակներ է հետապնդում։
Հայաստանում ընթացող զարգացումները պետք է տարածաշրջանային զարգացումների լույսի ներքո դիտարկել։ Հետևաբար պարզ է, որ Նիկոլն այս պահին ոչ թե իշխանություն պահելու, այլ իր արտաքին գործընկերներին դրանում վստահեցնելու խնդիր ունի։ Էրդողանը պետք է չկասկածի, որ Նիկոլը «ուժեղ տղա է»։ Նա պետք է չանհանգստանա, որ Հայաստանում կարող է անսպասելի զարգացումներ լինեն։ Հենց դրանով էլ զբաղված է Նիկոլը։ Ուրիշ ոչ մի նպատակ այս ձերբակալությունները չեն հետապնդում»։