«Նիկոլ Փաշինյանի քայլերը հաճախ ուղղված են ազգային արժեքների և ինքնության կազմաքանդմանը»․ Էրիկ Բեգլարյան

Արցախի փաստաբանների պալատի նախագահ Էրիկ Բեգլարյանի ֆեյսբուքյան գրառումը. «Շատ ցավալի է ականատես լինել Նիկոլ Փաշինյանի վարած քաղաքականությանը, որը բազմաթիվ առումներով կարելի է բնութագրել որպես հակաեկեղեցական, հակահայկական, հակապետական և հակաազգային։ Նրա քայլերը հաճախ ուղղված են ազգային արժեքների և ինքնության կազմաքանդմանը, իսկ Հայ Առաքելական Եկեղեցու նկատմամբ որդեգրած վերաբերմունքը վկայում է նրա իշխանության կողմից իրականացվող համակարգված հակաեկեղեցական քաղաքականության մասին։
Նման դիրքորոշումը հատկապես վտանգավոր է մեր պետության համար, երբ երկիրը կանգնած է ծանրագույն մարտահրավերների առաջ՝ թե՛ արտաքին թշնամիների, և թե՛ ներքին պառակտումների տեսքով։ Ազգային միասնության հիմքերը քանդելով՝ այս քաղաքականությունը թուլացնում է հայության դիմակայունությունը և ջնջում այն արժեքային համակարգը, որը դարեր շարունակ պահել է մեր ինքնությունը։
Հասարակության լայն շերտերի մոտ արդարացիորեն առաջանում է մտահոգություն, որ նման վարքագիծը ոչ միայն նպաստում է ազգային ինքնության կորուստին, այլ նաև բացում է դուռը օտար շահերի առաջ՝ ներառյալ թրքական ազդեցության խորացումը Հայաստանի ներսում»։