«Միքայել արքեպիսկոպոս Աջապահյանի գործով դատական նիստը հետաձգվեց»․ Երեմ Սարգսյան

«Նիստը նշանակված էր 24․00-ին, նյութերը ստացել ենք 23․59-ին, պետք է հասցնենք ծանոնթանալ և՛ միջնորդությանը, և՛ նյութերին»,- այս մասին դատարանի բակում լրագրողների հետ զրույցում հայտնեց Միքայել արքեպիսկոպոս Աջապահյանի պաշտպան Երեմ Սարգսյանը։

«Նյութերն ուղարկվել են նաև մյուս պաշտպաններին, կծանոթանանք, կներկայանք դատական նիստին, ժամը 02․30-ին դատական նիստը պետք է շարունակվի»,- հավելեց Սարգսյանը։

Հիշեցնենք՝ Շիրակի թեմի առաջնորդ Միքայել արքեպիսկոպոս Աջապահյանի նկատմամբ ՀՀ քրեական օրենսգրքի 422-րդ հոդվածի 2-րդ մասով հարուցվել է հանրային քրեական հետապնդում, այն բանի համար, որ «նա զանգվածային լրատվամիջոցների, տեղեկատվական և հաղորդակցական տեխնոլոգիաների օգտագործմամբ, իշխանությունը զավթելուն և սահմանադրական կարգը բռնի տապալելուն ուղղված հրապարակային կոչեր է կատարել»:

Աջապահյանը մեղադրանքը չի ընդունում:
Քննիչը միջնորդել է դատարանին կալանավորել Միքայել սրբազանին: Դատարանի կողմից Սրբազանին ձերբակալելու պահից 24 ժամվա ընթացքում դատարանը պետք է որոշում կայացնի:
Միքայել արքեպիսկոպոս Աջապահյանի պաշտպանների գնահատմամբ՝ մեղադրանքն ակնհայտ անհիմն է։