«Իրանի իշխանությունները երբեք չեն աջակցել Դոնալդ Թրամփի դեմ մահափորձին». Փեզեշքիան

ԱՄՆ-ի նախագահ Դոնալդ Թրամփը պետք է ընտրություն կատարի՝ նպաստել Մերձավոր Արևելքում խաղաղությանը, թե՞ թույլ տալ Իսրայելին՝ ներքաշել Միացյալ Նահանգներին Իրանի հետ պատերազմի մեջ։ Այս մասին ամերիկացի լրագրող Թաքեր Քարլսոնի հետ հարցազրույցում հայտարարել է Իսլամական Հանրապետության նախագահ Մասուդ Պեզեշկյանը։

«Թրամփը կարող է կամ մեր տարածաշրջանը տանել դեպի խաղաղություն և պայծառ ապագա և Իսրայելին դնել իր տեղը, կամ ընկնել փոսի, անհատակ փոսի, ճահճի մեջ, [մտնել] պատերազմի մեջ, որի մեջ Նեթանյահուն ցանկանում է ներքաշել Միացյալ Նահանգներին կամ ԱՄՆ-ի նախագահին։ Ընտրությունը կախված է Ամերիկայի նախագահից»,- ասել է Փեզեշքիանը։

Իսլամական Հանրապետության նախագահը նաև ասել է, որ Իրանը պատրաստ է վերսկսել բանակցությունները Միացյալ Նահանգների հետ, բայց կա վստահության խնդիր։ «Ինչպե՞ս ենք մենք կրկին վստահելու Միացյալ Նահանգներին։ Կվերադառնա՞նք բանակցություններին, և ինչպե՞ս կիմանանք, որ բանակցությունների ընթացքում Իսրայելի ռեժիմին թույլ չեն տա կրկին հարձակվել մեզ վրա»,- հարցրել է Իրանի նախագահը։

Փեզեշքիանը հարցազրույցում ասել է, որ Մերձավոր Արևելքում նոր զինված հակամարտությունը կխորացնի տարածաշրջանի անկայունությունը և կվնասի ամերիկյան շահերին։ Միևնույն ժամանակ, Իրանի նախագահը նշել է, որ Իրանը կարող է ինքնուրույն պաշտպանել իր ինքնիշխանությունն ու տարածքային ամբողջականությունը. «Մենք կարող ենք ինքնուրույն պաշտպանել մեր երկիրը և նրա տարածքային ամբողջականությունը։ Մենք դա կանենք մինչև արյան վերջին կաթիլը։ Ինչպես ես բազմիցս նշել եմ, մենք պատերազմ չենք ուզում և [չենք ձգտում ստեղծել] միջուկային զենք, այս կեղծ պատկերը ամերիկացի պաշտոնյաների մտքում առաջացել է Նեթանյահուի և Իսրայելի ռեժիմի դիվային մեքենայությունների և պատերազմ հրահրելու նրա քաղաքականության արդյունքում»։

Խոսելով Իսրայելի հետ առճակատման պատճառների մասին՝ Իրանի նախագահն ասել է, որ ստեղծված իրավիճակի համար մեղավոր են Իսրայելի իշխանությունները՝ «արգելափակելով դեղորայքի և սննդի ներմուծումը, ռմբակոծելով դպրոցներն ու հիվանդանոցները և իրականացնելով լայնածավալ ցեղասպանություն Պաղեստինում»։

Իրանի իշխանությունները երբեք չեն աջակցել ԱՄՆ-ի նախագահ Դոնալդ Թրամփի դեմ մահափորձին, ասել է Իրանի նախագահ Մասուդ Փեզեշքիանը։ «Սրանք ակնարկներ են, որոնց Նեթանյահուն փորձում է հավատացնել ձեր ժողովրդին կամ ձեր նախագահին, բայց դրանք իրականությանը չեն համապատասխանում»,- ասել է Փեզեշքիանը՝ պատասխանելով այս թեմայի վերաբերյալ հարցին։

2024 թվականի հուլիսին և սեպտեմբերին Թրամփի դեմ մահափորձեր են իրականացվել։ Հետագայում նա հայտարարել է, որ Իրանը սպառնալիք է ներկայացնում իր կյանքի համար։ Թրամփի քարոզարշավը հայտնել է, որ ԱՄՆ-ի հետախուզությունը նրան տեղեկացրել է «Իրանից եկող իրական և կոնկրետ սպառնալիքների» մասին, որոնք ուղղված են Միացյալ Նահանգների ապակայունացմանը։

Մասուդ Փեզեշքիանը Թաքեր Քարլսոնի հետ հարցազրույցում նաև ասել է, որ «ցավոք, Միացյալ Նահանգների կողմից մեր միջուկային կենտրոնների և օբյեկտների վրա իրականացված անօրինական հարձակումների հետևանքով մեծ քանակությամբ սարքավորումներ և օբյեկտներ լուրջ վնաս են կրել։ Հետևաբար, մենք դրանց հասանելիություն չունենք»։ Նրա խոսքով՝ պետք է սպասել, գնահատել վնասը, որպեսզի կարողանան ապահովել միջուկային ծրագրի վերահսկողությունը։