«Կալանքի որոշումը կբողոքարկենք, նաև հատուկ վերանայման բողոք կներկայացնենք Վերաքննիչ դատարան»․ Սմբատ Մինասյան

«Դատարանը որոշեց քննիչի միջնորդությունը բավարարել, երկուամսյա կալանք տվեց Արթուր Սարգսյանին, տեսակցություններն էլ սահմանափակվեցին՝ բացառությամբ մերձավոր ազգականների և պաշտպանների»,- այս մասին լրագրողների հետ զրույցում հայտնեց Արթուր Սարգսյանի պաշտպան Սմբատ Մինասյանը։

«Քննիչը 3 հիմք էր ներկայացրել կալանավորման համար, սակայն դատարանն արձանագրեց, որ երկու հիմքը բացակայում են՝ մասնավորապես նոր հանցանք կատարելը և փախուստի դիմելն ու թաքնվելը։ Միայն քննությանը խոչընդոտելու հավանականությունը գնահատելով իրատեսական՝ դատարանը երկամսյա կալանավորման որոշում կայացրեց»,- պարզաբանեց պաշտպանը։

Նա նաև հավելեց, որ կալանքի վերաբերյալ դատարանի որոշումը կբողոքարկվի։ «Բողոքի մեջ կներառենք նաև բացարկի հետ կապված խնդիրները․․․ Որոշմամբ անդրադարձ կա նաև անձեռնմխելիությանը, դրա մասով ևս հատուկ վերանայման բողոք կներկայացնենք Վերաքննիչ դատարան, ակնկալում ենք, որ հատուկ վերանայման բողոքը կբավարարվի»,- նշեց Մինասյանը։