«Վերաքննիչ դատարանում եթե արմենդանիելյանական արդարադատություն չլինի, հնարավոր է՝ կալանքի գերակայությունն ընդհատվի»․ Արամ Վարդևանյան

«Հիմքերի տեսանկյունից անհնար էր համարել, որ կալանքը պետք է կիրառվեր, այսպես ասած, պատշաճ վարքագիծն ապահովող խափանման միջոց։ Դատական նիստին առաջարկել էինք տնային կալանքը որպես խափանման միջոց դիտարկելը՝ նույնիսկ համակցված գրավի հետ։ Ընկալելի չէ այս դատական ակտը, այն չի կարող համարվել իրավաչափ, չի համապատասխանում իրավունքի պահանջին»,- այս մասին լրագրողների հետ զրույցում նշեց փաստաբան Արամ Վարդևանյանը՝ անդրադառնալով «Հայաստան» խմբակցության պատգամավոր Արթուր Սարգսյանի երկամսյա կալանավորման որոշմանը։

«Պետք է արձանագրել, որ Քննչական մարմնի և դատախազության ռիսկերի տեսանկյունից որոշակի նահանջ դատարանն ապահովել է, բայց երբ անձը 2 ամիս պետք է կալանավորված լինի, այն դեպքում, երբ 15 օր ազատության մեջ է եղել և դրսևորել է պատշաճ վարքագիծ, այս որոշումը ողջամիտ չէ»,- նշեց փաստաբանը՝ հավելելով, որ պաշտպանների կողմից իրավունքի պաշտպանության բոլոր մեխանիզմներ իրացվելու են՝ ակնկալելով, որ ի վերջո արդարությունը կգերակայի։

«Բավարար հիմքեր կան բողոքարկման համար։ Եթե Վերաքննիչ քրեական դատարանում արմենդանիելյանական արդարադատություն չլինի կամ հենց վերջինիս չմակագրվի գործը, հնարավոր է՝ իսկապես կալանքի գերակայությունն ընդհատվի»,- ընդգծեց Վարդևանյանը։