«Արթիկի բաց աղբավայրը դարձել է էկոլոգիական աղետի աղբյուր»․ Մհեր Մելքոնյան

ԱԺ «Հայաստան» խմբակցության պատգամավոր Մհեր Մելքոնյանի ֆեյսբուքյան գրառումը․ «Այս կարևոր խնդիրն ըստ էության տարիներ շարունակ մնացել է ստվերում՝ ինչպես կառավարության, այնպես էլ համայնքային իշխանությունների մակարդակում։
Խոսքը Արթիկի համայնքում գործող բաց աղբավայրի մասին է, որի վիճակը հասել է այն սահմանագծին, երբ լռությունը այլևս նույնացվում է հանցավոր անտարբերության հետ։
Տարիներ շարունակ շահագործվող բաց աղբավայրը դարձել է էկոլոգիական աղետի իրական աղբյուր։
Արթիկի աղբավայրը՝
– չունի սանիտարական որևէ նորմ,
– հանդիսանում է մշտական հրդեհավտանգ տարածք,
– արտահոսքով աղտոտում է շրջակա հողերը,
– և ամենավտանգավորը՝ սպառնում է համայնքի բնակչության առողջությանը։
Արթիկի աղբավայրի աղետը՝ համայնքային անգործության և անպատասխանատվության բացահայտ արդյունք է։
Վերջին օրերին բազմաթիվ արթիկցիներ դիմել են ինձ՝ խիստ մտահոգված իրենց բնակավայրի աղբավայրի սարսափելի և անտանելի վիճակով։ Նրանց ձայնը լսելի դարձնելն իմ պարտականությունն եմ համարում։
Խնդրի շուրջ ստեղծված իրավիճակը պահանջում է արտակարգ կարգով միջամտություն պետական մակարդակով։
Դիմում եմ պատկան մարմիններին՝ մշակել և շատ արագ սկսել այս խնդրի լուծման ծրագիր՝
-աղբավայրի փակման
-սանիտարական մաքրման
-նոր աղբավայրի կամ աղբի վերամշակման կենտրոնի կառուցման ուղղությամբ։
Այս հարցը պետք է լուծվի ոչ վաղը, այլ այսօր»։