Հակաահաբեկչական գործողությունների ժամանակ ոստիկանության գվարդիան կարող է հատուկ տեխնիկա կիրառել

Կառավարությունն այսօրվա նիստում չզեկուցվող հարցերի թվում ընդունեց որոշում, որով սահմանվում է ոստիկանության գվարդիայի սպառազինության մեջ ընդգրկվող հատուկ տեխնիկայի ցանկը։

ՆԳՆ կողմից մշակված և հանրային քննարկման դրված կառավարության որոշման նախագծի մեջ նշվում էր, որ ոստիկանության գվարդիայի սպառազինության մեջ կընդգրկվի հատուկ տեխնիկա՝ զրահափոխադրիչ ԲՏՌ-80, զրահափոխադրիչ ԲՌԴՄ-2։

Կառավարության հիմնավորման մեջ նշվում է․ «2024թ. հոկտեմբերի 24-ին ընդունվել է «Ոստիկանության գվարդիայի մասին» օրենքը, համաձայն որի՝ հակաահաբեկչական գործողությունների իրականացմանը մասնակցելիս կամ ռազմական դրություն հայտարարված տարածքում իրականացվող պատերազմական գործողությունների շրջանակներում հատուկ առաջադրանքներ կատարելիս ոստիկանության գվարդիայի ծառայողը ոստիկանության պետի հրամանով իրավասու է օրենքով նախատեսված լիազորությունների պատշաճ իրականացումն ապահովելու համար գործադրելու ոստիկանության գվարդիայի սպառազինության մեջ ընդգրկված հատուկ տեխնիկա, որի ցանկը սահմանում է կառավարությունը»։