Երեխաների համար պետպատվերի գումար չկա. «Ժողովուրդ»

«Ժողովուրդ»-ը գրում է. «Պետական համակարգում օրը մեկ օրենք գրող և հաստատող պաշտոնյաներից մեկը երեկ Ազգային ժողովում հաստատեց, որ թողարկված օրենքների հետևողականությունը և դրանց մասին տեղեկատվության տիրապետումը զրոյական մակարդակում է։
Երեկ ԱԺ Ֆինանսավարկային և բյուջետային հարցերի մշտական հանձնաժողովում տեղի ունեցավ «ՀՀ և Ասիական զարգացման բանկի միջև ««Առողջապահության որակի բարելավման ծրագիր» վարկային համաձայնագիրը վավերացնելու մասին» օրենքի նախագծի առաջին ընթերցմամբ քննարկումը։
Քննարկման ժամանակ ՔՊ-ական պատգամավոր Արուսյակ Մանավազյանը ծրագիրը ներկայացնող առողջապահության փոխնախարար Լենա Նանուշյանի՝ մարզային այցերի ժամանակ առնչված խնդրի վերաբերյալ հասարակ մի հարց տվեց. «Ունե՞նք արդյոք պետպատվերի խնդիր, թե՞ ոչ»։
«Պետպատվերի մասին ես որևէ խնդրի մասին տեղյակ չեմ, պետպատվերը գործում է։ Եթե խնդիր կա, մեզ տեղեկացրեք։ Մենք չունենք խնդիր պետպատվերի իրականացման հետ կապված։ Ամեն դեպքում, ես տեղյակ չեմ»,- պատասխանում է Նանուշյանը։

Մանավազյանը, չցանկանալով փոխնախարարին վատ դրության մեջ դնել, փորձում էր չընդգծել նրա անտեղյակությունը և շրջանցում է հարցը, ինչը չընդունեց ՔՊ-ական Էդգար Հակոբյանը։

Վարչապետի տիկին Աննա Հակոբյանի ազգականը փոխնախարարին սեփական օրինակով ներկայացրեց, թե ինչ խնդիրներ կան պետպատվերի տրամադրման վերաբերյալ։
«Տիկի՛ն Նանուշյան, ասացիք՝ տեղյակ չեք, խնդիր կա թե ոչ, բայց ես կարծում եմ՝ կա։

Իմ 5 տարեկան տղային մեկ ամիս առաջ վիրահատել էին արտերկրում։ Հետո հրատապ խնդիր կար կոտրվածքի հետ կապված, բժշկական միջամտություն էր պետք, բարդություն էր տվել։ Մի խոսքով՝ հիվանդանոցում ասել են՝ պետպատվեր չկա։ Ես հնարավորություն ունեի այդ վճարը կատարելու, արեցի, բայց կարծում եմ, որ խնդիր կա։ Սոցիալապես անապահով խավի մեր հայրենակիցները այդ դեպքում չգիտեմ՝ ինչ պետք է անեն։ Ինձ ասացին՝ պետք է հերթագրվեք, բայց բժիշկն ասաց, որ հրատապ է, անմիջապես է պետք միջամտություն իրականացնել, ու եթե հերթ պահեի, մոտ մեկ ամսից մեր հերթը կհասներ, ինչը, կարծում եմ, նորմալ չէ»,- եզրափակեց Հակոբյանը։
Փոխնախարարը փորձեց արդարանալ, որ հերթագրումը նորմալ երևույթ է, որ սա միջազգային փորձ է, աշխատում ենք՝ վստահություն հայտնելով, որ համակարգում խնդիր չկա անհետաձգելի պետպատվերի տրամադրման առնչությամբ։

Հակոբյանը պնդեց՝ անձամբ ինքն է բժիշկների հետ խոսել, բժիշկն ասել է, որ անցած երկուշաբթի օրվանից էլ պետպատվեր չկա: Նա անգամ պատրաստակամություն հայտնեց, որ կարող է տալ բուժհաստատության և բժշկի համարը։
«Կարող է մի բան ձեզ սխալ են զեկուցում։ Ամեն դեպքում, կարծում եմ, որ այդ խնդրի հետևից գնալ է պետք։ Եթե, օրինակ, անչափահաս երեխաները որևէ բուժօգնության կարիք են ունենում, ստացվում է՝ եթե գումար չունեն, ոչ մի բան չպետք է արվի փաստացի»։

Փոխնախարարը կրկին արդարացավ՝ մեղքը բուժհաստատության վրա բարդելով կամ նշելով. «Ես հնարավոր է լիարժեք տեղեկացված չեմ, որովհետև այստեղ գալուց առաջ ես տեղեկացված չեմ եղել այդ հարցերից»:

Այնինչ հենց առնվազն այդտեղ գալուց առաջ պետք էր տեղեկանալ։ Իսկ անտեղյակ պաշտոնյաներին նորմալ երկրում հեռացնում են աշխատանքից անմիջապես:
Պետական առողջապահական գործակալության պետ Սամվել Խարազյանի հետ զրույցում փորձեցինք հասկանալ, թե որոնք են այս խնդրի բուն արմատները, ինչու է պետպատվերն ավարտվել և ինչ պետք է անել այդ պարագայում։ Խարազյանը հերթագրումը նորմալ համարեց և բառախաղի պես մանիպուլացրեց։

«Որոշ միջոցառումների մասով է, որ հերթագրում ունենք։ Պետպատվերի տրամադրումը չի ավարտվել, այլ հերթագրումով է իրականացվում։ Պայմանավորված է այլ միջոցառումներով նախատեսված գումարների սահմանաչափերի սպառմամբ։ Այսինքն՝ սահմանաչափեր ենք դնում միջոցառման համար յուրաքանչյուր ամսվա կտրվածքով, թե տվյալ ամիս այդ միջոցառումով որքան դեպքեր կարող ենք սպասարկել։

Երբ սահմանաչափը սպառվում է, հերթագրման համակարգն է աշխատում»,- նշեց Խարազյանը՝ «ավարտվել» և «սպառել» բառերի խաղով, որից էությունը չի փոխվում:
Ստացվում է, պետպատվերով տրամադրվող գումարները ոչ թե վերջացել են, այլ «սահմանաչափը սպառվել է»։

Սպառման պատճառն էլ, պարզվում է, դիմելիության քանակն է եղել. շատ են դիմել, և 8-րդ ամսում արդեն սպառվել են, օրինակ, անչափահասներին տրամադրվող պետպատվերները:

«Երեխաների մասով՝ միայն վերականգնողական, իսկ մեծերի մասով դժվարամատչելի կանխորոշիչ հետազոտությունների համար սահմանաչափը սպառվել է, այժմ մենք աշխատում ենք, որ հասկանանք հերթագրման ծավալները, այսինքն՝ պահանջվող հետազոտությունների ծավալները որքան են կազմում մինչեւ տարեվերջ, ինչ հերթագրման ծավալ ունենք, եւ այդ գումարի շրջանակում դիմենք Կառավարությանը։ Եթե Կառավարությունն աջակցի, այդ փողերը լրացուցիչ տրամադրի, պետպատվերի հարցը կկարգավորենք»,- փոխանցեց Խարազյանը։

Խարազյանը թվային տվյալներ չկարողացավ տալ, քանի որ ձեռքի տակ թվեր չկային, իսկ կառույցում հոսանք չկար: ՀԷՑ-ով Կառավարությունն է զբաղվում. պետական կառույցում լույս չկա»։