«Սխալներ շատ է արել․ չգիտեմ՝ ինչ մեղքեր է գործել, բայց ինձ կուսակցությունից վռնդելը նրա գործած մեղքերից է»․ Հովիկ Աղազարյան

«Ես ուրախ եմ Արգիշտի Մեխակյանի և Դավիթ Խուդաթյանի համար․ ինչքան էլ քաղաքագիտական առումով անթույլատրելի է դա ասելը, բայց ես ուրախ եմ իրենց համար, եթե բոլորը լինեին Արգիշտի Մեխակյան և Դավիթ Խուդաթյան, ես հանգիստ խղճով կգնայի թոշակի։ Բայց վարչապետի խանդավառ գրառումները Վաղարշապատ համայնքի ընտրությունների վերաբերյալ, միտք չունեն, որովհետև այնտեղ ՔՊ-ն 30 տոկոս ձայն է հավաքել այնտեղ, իսկ դա միայն վարչական ռեսուրսն է»,- «Եվրոմեդիա»-ի հետ զրույցում այս մասին նշեց ԱԺ պատգամավոր, ՄԱՍԿ Կուսակցության համահիմնադիր Հովիկ Աղազարյանը՝ նաև կարծիք հայտնելով, որ եթե Նիկոլ Փաշինյանը Վաղարշապատում մասնակցեր քարոզարշավին, դա բացասական դեր կունենար, քանի որ «նա սպառել է իրեն»։

Աղազարյանի դիտարկմամբ՝ ճիշտ կլինի, եթե ընդդիմությունը 2026-ի ընտրություններին մասնակիցի դաշինքով։

Անդրադառնալով դիտարկմանը, որ վարչապետ Փաշինյանի խոսքով՝ «պատարագների շարքը կարևոր է․ Սրբության Սրբոց Մայր Աթոռ հասնելու համար պետք է մեղքերից մաքրվել», և հարցին, թե արդյոք նա շատ մեղք է գործել, Աղազարյանն արձագանքեց․ «Իմ հանդեպ մեղք է գործել, կուսակցությունից ինձ վռնդելը նրա գործած մեքերից մեկն է, ես չգիտեմ ուրիշ ինչ մեղքեր է գործել, սխալներ շատ է արել է, բայց ես հոգևորական չեմ, որ այդ կոնտեքստով նայեմ»։