«Եվրոպական քարոզչությունն ու հեռանկարները ժողովրդի մոտ ոգևորություն չեն առաջացնում». Սևակ Հակոբյան

Լրագրող, խմբագիր Սևակ Հակոբյանի ֆեյսբուքյան գրառումը՝ կից տեսանյութով. «Այս տարի մեր երկրում տեղի ունեցած ՏԻՄ ընտրությունների արդյունքները շատ ուշագրավ ընդհանուր կապ ունեն։ Բանը նրանում չէ, որ իշխանությունը ամեն քայլի դիմել է Վաղարշապատում ընտրվելու, Գյումրիում՝ անգամ չընտրվելուց հետո համայնքապետի աթոռը խլելու համար։
Այսպես․ 2025թ․ մարտի 26-ին ՀՀ խորհրդարանը ամբողջությամբ ընդունեց Եվրամիության անդամակցության մեկնարկի մասին օրինագիծը։ Նախաձեռնողը «Եվրաքվե»-ն էր, քաղաքացիներից հավաքել էր 60 հազար ստորագրություն։ Օրենքի ընդունումից ընդամենը 4 օր անց՝ մարտի 30-ին, մեր երկրում տեղի ունեցավ ընտրություն երկրորդ ամենախոշոր քաղաքում՝ Գյումրիում․ Մասնակցում էին նաև «Եվրաքվեն» նախաձեռնած ուժերը, այս անգամ՝ «Եվրադաշինք»-ով։ Սակայն հավաքեցին ընդամենը 2113 ձայն, այսինքն՝ անգամ չմտան ավագանու կազմ։ 60 հազար ստորագրություն հավաքածները 111 հազար բնակչության հազիվ 2100-ի ձայները տարան։
Ընդամենը մի քանի օր առաջ՝ նոյեմբերի 16-ին, ևս ընտրություններ էին, այս անգամ՝ Վաղարշապատում։ Մասնակցում էր նաև «Հանրապետություն» կուսակցությունը՝ այդ «Եվրաքվեի» նախաձեռնողներից մեկը։ Այս անգամ, սակայն, գրանցեցին քանակային առումով ավելի վատ արդյունք՝ 1200 ձայն ու էլի չմտան ավագանի։
Ինչո՞ւ է ժողովուրդը այսպես գնահատում արևմտյան քարոզիչներին։ Պատճառը Վիզաների ստացման դյուրացումների փոխարեն դժվարացումնե՞րն են, հերթերն ու փող կորզե՞լը, գուցե պատճառը Հայաստանում կատարվողի նկատամբ արևմուտքի անտարբերությո՞ւնն է, գուցե պատճառը խաբված լինե՞լն է և 2,6 մլրդ եվրո խոստացած գումարի չտրամադրումը։ Կամ էլ, գուցե, քարոզող կերարնե՞րն են անընդունելի, վստահություն չներշնչող, որովհետև կարծես վատ բաներից չեն խոսում։ Պատճառը թե որն է՝ չգիտենք, բայց փաստ է, որ Եվրոպական քարոզչությունն ու հեռանկարները ժողովրդի մոտ ոգևորություն չեն առաջացնում»: