«Փաշինյանի և թիմի համար չկան կայուն և անփոփոխ սկզբունքներ». Թաթուլ Հակոբյան

Լրագրող Թաթուլ Հակոբյանի ֆեյսբուքյան գրառումը․ «Երբ վարչապետ Փաշինյանն ու թիմը ասում էին՝ Արցախը Հայաստան է ու վերջ, նրանք համոզված էին, որ իրենք ճիշտ են:
Այսօր, երբ Փաշինյանն ու թիմը ասում են՝ Արցախը Ադրբեջան է, նրանք նույնչափ համոզված են, որ ճիշտ են:
Երբ Փաշինյանը շուրջպար էր բռնել Շուշիում կամ նկարվում էր Պապիկ-տատիկի առաջ, նա համոզված էր, որ բերդաքաղաքը հայոց հպարտությունն է:
Երբ պարտությունից հետո ասում էր, որ Շուշին դժգույն ու դժբախտ քաղաք է, նա նույնքան համոզված է, որ Հայաստանի բոլոր դժբախտությունների պատճառը Արցախն է:
Երբ վարչապետը Սևր էր թափահարում, համոզված էր, որ ճիշտ տեքստ է:
Այսօր, երբ Արևմտյան Հայաստանը համարում է Արմավիրի մարզը, ավելի է համոզված է, որ ինքը ճիշտ է:
Երբ վարչապետը համբուրում էր Գարեգին Բ-ի պարզած խաչը, համոզված էր, որ իր դեմ կանգնած է Ամենայն հայոցը:
Այսօր, երբ ցուցադրական ծնկի է իջնում եկեղեցում և համբուրում Տեր Արամի կամ հակաԳարեգին որևէ այլ հոգևորականի պարզած խաչը, համոզված է, որ ինքը և թիմը ճիշտ ճանապարհին են:
Երբ սպառնում էր Իլհամ Ալիևին, որ կխոսի Ադրբեջանի հասարակության հետ՝ անկարկելով հեղափոխական ալիքի տարածում հարևան հանրապետությունում, համոզված էր, որ դա է ճիշտ քաղաքականությունը:
Այսօր, երբ նա ու թիմը պապանձված է ու չի կարող որևէ թթու խոսք ասել Ալիևի հասցեին, անգամ երբ նրա գործընկերը կարող է վիրավորանք հասցնել, նրանք համոզված են, որ ճիշտ քաղաքականությունը դա է:
Վարչապետ Փաշինյանի և թիմի համար չկան կայուն և անփոփոխ սկզբունքներ և իզմ-եր, այլ կա իրավիճակ և այդ իրավիճակին հարմարվելու և վերապրելու աներևակայելի տաղանդ»: