«Սպանության գործով ձերբակալվել են ԵԿՄ-ական «Մասիվցի Գիժ Ավոյի» թոռը և նրա ընկերը»․ Լիա Սարգսյան

Լրագրող Լիա Սարգսյանի ֆեյսբուքյան էջում գրել է․ «Բորիս Արզումանյանի սպանության գործով ձերբակալվել էլ ԵԿՄ-ական «Մասիվցի Գիժ Ավոյի» թոռը և նրա ընկերը
«Իշխանություն» լրատվականի տեղեկություններով՝ Բորիս Արզումանյանի սպանության գործով ձերբակալվել են ԵԿՄ անդամ Ավետիս Խաչատրյանի՝ «Մասիվցի Գիժ Ավոյի» թոռ Հակոբ Խաչատրյանը և ավտոմեքենան վարած Արտակ Դիլանյանը։
Նոր Նորքի Շոպրոնի փողոցում չորս օր առաջ կեսգիշերին Մասիվում գործող հակադիր խմբավորումների հերթական բախումը ողբերգական ավարտ ունեցավ․ սպանվեց 31-ամյա Բորիս Արզումանյանը։ Այդ գիշեր Մասիվում հայտնի խմբավորումները հավաքվել էին «ռազբոռկայի»՝ նախկինում տեղի ունեցած միջադեպի շուրջ։ Ընդհարման կողմերից մեկը եղել է «Գիժ Ավոյի» թոռ Հակոբ Խաչատրյանը, իսկ մյուսը՝ թաղային հեղինակություն «Մասիվցի Մոնչի» շրջապատը։
«Իշխանության» տեղեկություններով՝ դեպքի պահին Խաչատրյանն ու Դիլանյանն ավտոմեքենայով վերադառնում էին հարսանեկան միջոցառումից և գտնվել են ալկոհոլի ազդեցության տակ։ Ծեծկռտուքի ընթացքում նրանք փորձել են փախուստի դիմել, և մյուս կողմին վախեցնելու նպատակով մեքենան սկսել են անկանոն վարել, ինչի հետևանքով էլ տեղի է ունեցել ողբերգական վրաերթը։
Պարզվում է՝ Հակոբ Խաչատրյանը նախկինում ևս աչքի է ընկել խուլիգանական վարքագծով։ Ժամանակին համացանցում լայն տարածում էր գտել տեսանյութ, որտեղ մի տղամարդ բռնության էր ենթարկվում իր երեխայի ներկայությամբ։ Ըստ շրջանառվող տեղեկությունների՝ տեսագրության մեջ բռնության ենթարկող անձը Հակոբ Խաչատրյանն է։ Դեպքը, սակայն, իրավական ընթացք չէր ստացել։ Արզումանյանի սպանությունը փաստում է, որ թաղային հեղինակությունները և հատուկ կապեր ունեցող ընտանիքները գործում են օրենքից դուրս, և մնում են անպատիժ»։