«Ովքեր դեմ են Ադրբեջանի, Թուրքիայի գիրկը թռնելուն, մեր ազգային իղձերից հրաժարվելուն, համարում են «ռսի գործակալ»»․ Սևակ Հակոբյան

Լրագրող, խմբագիր Սևակ Հակոբյանը ֆեյսբուքյան իր էջում տեսանյութ է հրապարակել՝ կից գրառմամբ․ «Ի՞նչ է ազդեցության գործակալը․ մարդ կամ կառույց, որը թաքուն կամ բացահայտ ազդեցություն է գործում որևէ երկրի, նրա հասարակության, հանրային կարծիքի վրա՝ օտար պետության, կազմակերպության կամ խմբի շահերը առաջ մղելու համար։
Մեր երկրում այս վերջին տարիներին ու հատկապես՝ 2020-ից հետո ո՞ր երկրի ու ո՞ր խմբի շահերն են առաջ մղվում։ Հայաստանի իշխանությունը, նրա աջակից գործիչները, նրանց սպասարկող ֆեյքերը առավոտից իրիկուն փորձում են փոխել մարդկանց կարծիքն առ Ադրբեջան, Թուրքիա, Արևմուտք, Ռուսաստան, բարեկամներին ներկայացնում են թշնամի, թշնամիներին՝ բարեկամ, թշնամու հետ բարեկամությունը՝ միակ հույս։ Գիշեր ու զօր քարոզ են տանում, թե Արևմուտքը լավ գործընկեր է, Ռուսատանը գցել է, Ադրբեջանը կիրթ ու կառուցողական է, տարածում են ապատեղեկատվություն ու հենց էդ ուղղությամբ են տանում հանրային տրամադրությունները։ Սրանք դրա անունը չգիտես ինչի դնում են ազգային, պետական շահ․ բայց հարց տամ՝ իսկ ո՞ր ազգի ու պետության շահն է։ Հաստատ՝ ո՛չ Հայաստանի ու հայ ժողովրդի։
Բայց այդքանով հանդերձ, սրանք գործակալ են համարում հենց նրանց, ովքեր իրենց կարծիքը չեն կիսում․ նրանց անվանում են ռսի գործակալ։ Ռուսաստանի արտգործնախարարության պաշտոնական ներկայացուցիչը հարց է տալիս․ «Ի՞նչ չափանիշներով են Հայաստանի իշխանությունները նույնականացնում կամ բռնում ռուսական ազդեցության գործակալներին: Ովքե՞ր են նրանք: Արդյո՞ք նրանք են, ովքեր պաշտպանում են երկկողմ հարաբերությունների զարգացումը»։
Այո, վստահաբար՝ չափանիշը դա է, որովհետև գործակալ են համարում նրանց, ովքեր դեմ են ադրբեջանի գիրկը թռնելուն, Թուրքիայի գիրկը թռնելուն, մեր ազգային իղձերից, նպատակներից, սիմվոլներից հրաժարվելուն, մեր ռազմավարական գործընկերոջից հրաժարվելուն։ Եթե պայքարում են, որ երկիրը չգնա կռախի, ուրեմն անվանվում են «ռսի գործակալ», եթե պայքարում են, որ Հայաստանը մտնի Արևմուտքի, իսկ իրականում Թուրքիայի տակ, ուրեմն հռչակվում են պետականամետ։ Կարծես թե սա՛ է չափանիշը։ Ու ի դեպ, այդ քարոզչությունը վճարովի է և եկող տարվա առաջին կիսամյակի համար արժենալու է 12 մլն եվրո։ Իսկ մինչ ա՞յս որքան է արժեցել»։