«ՀՀ-ի պետական մակարդակով Հայաստանն է հռչակվում «կոնֆլիկտի օջախ»»․ Հակոբ Բադալյան

Քաղաքական մեկնաբան Հակոբ Բադալյանը ֆեյսբուքյան իր էջում գրում է․ «Արցախյան կոնֆլիկտում Հայաստանի և Ադրբեջանի միջև հավասարության նշան դնելու հետևողական աշխատանքը Հայաստանում սկսվել է դեռևս մոտ 15 տարի առաջ:
Այդ ժամանակաշրջանում բավականին ակտիվացան Հայաստանում «խաղաղասիրական» խոսակցությունները, քննարկումները, աստիճանաբար՝ այս ամենի ներքո դրամաշնորհային ծրագրերի ակտիվացումը:
Դեռ այդ ժամանակից բազմաթիվ գրառումներ ու հոդվածներ եմ գրել այդ թեմայով՝ խոսելով այն մասին, որ հայաստանցիներին «խաղաղասիրություն» սովորեցնելը կամ ներշնչելը ոչ միայն արհեստական է, ոչ միայն՝ անարդար, այլ նաև խիստ վտանգավոր:
Որովհետև այդ երեւույթը կոնֆլիկտի էսկալացիայի համար հնարավոր պատասխանատվությունը աստիճանաբար տեղափոխելու էր Հայաստանի վրա՝ ստեղծելով միջազգային մի տպավորություն, թե խնդիրը հայաստանցիներն են, հայերը, ու բավական է նրանց բերել «խաղաղութապաշտական» դաշտ, և հակամարտությունը կկարգավորվի:
Իսկ այդ ընթացքում՝ հայության հանդեպ պետական մակարդակով ատելության քարոզի ներքո ձևավորվող, ատելության քարոզով ապրող ու շնչող ադրբեջանական հանրության հանդեպ և ոչ մի այդպիսի «հետաքրքրություն», անգամ հեռակա:
Այսօր արդեն ամենևին չեմ զարմանում «հավասարության նշանների» առատությունից: Թեև, օրինակ, Հայաստանի պետական մակարդակով ոչ թե հավասարության նշանի քաղաքականություն է, այլ նույնիսկ Հայաստանն է հռչակվում «կոնֆլիկտի օջախ»: Չէ՞ որ դե ֆակտո բարձրագույն պաշտոնյայի մակարդակով է Հայաստանի անկախության Հռչակագիրը հայտարարվել կոնֆլիկտային»: