«Կան իրավական ակտեր, որոնք արգելում են «փակել ղարաբաղյան շարժումը»»․ Էդգար Էլբակյան

Քաղաքագետ Էդգար Էլբակյանի ֆեյսբուքյան գրառումը․ «Այսօր դե-ֆակտո վարչապետը բառացիորեն ասել է՝ «երկրի վարչապետն ասում ա, որ Ղարաբաղյան շարժում չկա»։
Ֆիքսենք հետևյալը․ «ղարաբաղյան շարժում» նշանակում է Հայաստանի Հանրապետության առաջնորդությամբ Արցախի հայության անկապտելի իրավունքների պաշտպանություն համայն հայ ազգի կողմից։ Վերահաստատելով, որ իր հրամանով ՀՀ դե-ֆակտո կառավարությունը հրաժարվել է այդ իրավունքների պաշտպանությունից՝ սույն անձը խոստովանում է սահմանադրական կարգի հիմունքների և պետության անվտանգության դեմ ուղղված առերևույթ հանցագործություններ գործած լինելը։
Բանն այն է, որ կան մի շարք իրավական ակտեր, որոնք որևէ պաշտոնյայի, թեկուզ կառավարության գլխին, արգելում են «փակել ղարաբաղյան շարժումը»։ Դրանք են՝
1․ Հայկական ԽՍՀ Գերագույն խորհրդի և Լեռնային Ղարաբաղի ազգային խորհրդի որոշումը Հայկական ԽՍՀ-ի և Լեռնային Ղարաբաղի վերամիավորման մասին (01.12.1989 թ․, Նո. 1650-11),
2․ Հայաստանի անկախության մասին հռչակագիրը (23.08.1990 թ․, հ 0072-1)
3․ Հայաստանի Հանրապետության Գերագույն խորհրդի որոշումը Լեռնային Ղարաբաղի Հանրապետությունում ստեղծված իրավիճակի մասին (08.07.1992 թ․, Հ.Ն-0663-1)։
Երրորդ իրավական ակտում սևով սպիտակի վրա սահմանված են ՀՀ համար պարտադիր հետևյալ ներպետական նորմերը՝
«1. Հետևողականորեն սատար կանգնել Լեռնային Ղարաբաղի Հանրապետությանը և նրա բնակչության իրավունքների պաշտպանությանը:
2. Հայաստանի Հանրապետության համար անընդունելի համարել միջազգային կամ ներպետական ցանկացած փաստաթուղթ, որտեղ Լեռնային Ղարաբաղի Հանրապետությունը նշված կլինի Ադրբեջանի կազմում»։
Արցախի հանձնումը միայն ազգային դժբախտություն կամ մարդկային ողբերգություն չէ, այլ հօգուտ Հայաստանի թշնամիների իրականացված միտումնավոր և հետևողական քաղաքականություն, որի վերջնանպատակը Հայաստանի վերացումն է»։