«Ընդդիմադիր ուժերը պետք է վերլուծեն վերջին 6 տարիների իրադարձությունները»․ Հարութ Ուլոյան

Հրապարակախոս Հարութ Ուլոյանի ֆեյսբուքյան գրառումը․ «Ներքաղաքական հանրային կյանքում, ընտրություններին զուգահեռ, նոր խոսույթներ են ձևավորվում այն մասին, թե ընդդիմադիր ուժերն էլ են հասկացել, որ Ղարաբաղի մասին խոսելով՝ ձայն չեն բերի կամ մարդկանց ուշադրությունը չեն գրավի։ Որպես սրա ապացույց բերում են այն փաստարկները, որ կոնկրետ ուժեր բացարձակապես չեն խոսում Ղարաբաղի թեմայից կամ 44-օրյա պատերազմից։ Ու այս ամենը փորձում են բացատրել պոզիտիվ տեխնոլոգիայով կամ, նույնիսկ, իրատեսությամբ։ Ավելի հեռու գնացողներն այս ամենը բացատրում են «ժողովրդի տրամադրություններով», ակնարկելով, թե ժողովուրդը թքած ունի Ղարաբաղի թեմայի վրա։
Եթե հակիրճ, ապա եթե կան նման ուժեր, որոնք իրապես նման կարծիք ունեն ու պատրաստ են ընդդիմադիր դիրքերից ժողովրդից քվե հայցել՝ միաժամանակ թքած ունենալով Ղարաբաղի ու 44-օրյա պատերազմի թեմաների վրա, քանի որ այդ թեմաները «ձայն չեն բերում», ապա արժանապատվության նշույլ ունեցող ցանկացած ընտրող առաջինը հենց ինքը պետք է թքած ունենա նման ուժերի վրա։
Հարցը, բնականաբար, այն մասին չէ, որ Նիկոլից հետո Ղարաբաղը պետք է հետ բերենք, կամ որ ղարաբաղցիները պետք է վերադառնան Ղարաբաղ։ Ո՛չ։ Հարցը նրա մասին է, որ քանի դեռ մեր ժողովուրդը իրապես չի հասկացել, թե ինչ է մեր հետ կատարվել վերջին 6 տարիների ընթացքում, մեզ ոչ մի պոզիտիվ ապագա էլ չի կարող սպասվել։ Իսկ այն, որ Ղարաբաղ վերադառնալու կամ Ղարաբաղը վերադարձնելու օրակարգ չի կարող լինել մոտ տասնամյակներում, հենց այդ հնարավորության չգոյության մեղավորն ու պատասխանատուն էլ է նույն Փաշինյանը։
Եթե խոսակցությունը չի լինելու այն մասին, թե փաշինյանական ինչ աղետալի մակարդակի քաղաքականության հետևանքով ենք մենք ստացել 44-օրյա պետերազմը, կորցրել Ղարաբաղը, հայտնվել խաղաղություն մուրացողի կարգավիճակում, ապա անհասկանալի է մնում այն հարցը, թե այլ թեմաներով Նիկոլին հաղթելու հայտ ներկայացնողներն ու ընտրություններին մասնակցողներն ինչի՞ց են դժգոհ։ Եթե այդ ուժերը չեն խոսելու պատմականորեն մեզ հետ պատահած ամենածանր իրադարձություններից, եթե այդ ուժերի համար այդ իրադարձություններն այլևս անցյալում են ու օրակարգաստեղծ չեն, էլ Նիկոլի դեմ դուրս գալու իմաստը ո՞րն է։
Կրկին՝ հարցն այն մասին չէ, որ ընտրություններին պետք է անցյալի թեմաներով մասնակցել։ Ամենևին։ Հարցն այն մասին է, որ ցանկացած ուժ, ապագայի մասին վարդագույն խոստումներ շարադարելուց առաջ, պետք է հստակ վերլուծություններ ու գնահատականներ ներկայացնի հենց վերջին 6 տարիների իրադարձությունների վերաբերյալ։ Հակառակ դեպքում, այդ ուժն ուղղակիորեն հայտնվելու է Նիկոլի խաղաղության օրակագում՝ առաջարկելով նույն խաղաղությունը՝ առանց դրա տակ եղած 6-ամյա բովանդակության։