Էրեբունի ամրոցում պեղվում է Արգիշտի արքայի պալատը

Այսօր, 01:00

Այս օրերին հայ և ֆրանսիական արշավախմբերի կողմից համատեղ պեղվում է Էրեբունի ամրոցի միջնաբերդում գտնվող՝ Արգիշտի արքայի պալատն իր շրջակայքով։ Պալատական փոքր դահլիճում բացվել են որմնանկարների հետքեր։ Պալատի մեկ այլ հատվածում բացահայտվել են նաև տնտեսական գործունեության համար նախատեսված շինություններ, որոնցում կան հողի մեջ թաղված մեծ չափերի կարասներ:

Ըստ հնագետների՝ այդ կարասների մեջ հավանաբար պահվել են գինի, հացահատիկ, բուսական յուղեր, ջուր։ Ներկայում պեղվում և ավարտին է հասցվում անցյալ տարի բացահայտված քառասուն կարասներով շինության աշխատանքները։ Այս պեղումները ևս մեկ անգամ փաստում են, որ Էրեբունի ամրոցը ոչ միայն պալատական և կրոնական, այլ նաև տնտեսական նշանակությամբ կարևոր կենտրոն է եղել Ուրարտական թագավորության համար:

Այս տարվա հնագիտական պեղումներն Էրեբունու միջնաբերդում իրականացվում են «Էրեբունի» ՊՀԱԹ-ի և Ֆրանսիայի մշակույթի նախարարության հնագիտական ծառայության միջազգային համատեղ արշավախմբի կողմից։ Հայկական կողմի ղեկավարն է «Էրեբունի» ՊՀԱԹ տնօրեն, հնագետ Կարեն Ազատյանը, իսկ ֆրանսիական կողմի համաղեկավարը՝ Իլ դը Ֆրանս շրջանի հնագիտական ծառայության ղեկավար, դոկտոր Ստեֆան Դեշամը։
Էրեբունի ամրոցի հիմնական հնագիտական պեղումները սկսվել են 1950 թվականին՝ Կոնստանտին Հովհաննիսյանի ղեկավարությամբ։